Олтин нархи мутлақ рекорд даражада кўтарилди

Олтиннинг қиймати яна тарихий рекорд ўрнатди. Чикаго товар биржасида (CME) жорий йил апрель ойига мўлжалланган фьючерслар 0,34 фоизга ошиб, унцияси учун 3001,62 долларга етди ва шу тариқа биржа нархи биринчи марта унцияси учун 3000 доллар чегарасидан ошди. Бу ҳақда CME сайтида келтирилган.

Нархларнинг ўсишига дунё бўйлаб хавфсиз активларга бўлган талабнинг ортиши ва савдо кескинлигининг кучайиши сабаб бўлди. “Bloomberg” нашрининг ёзишича, олтин нархи тарихий максимумга етганига АҚШ Президенти Дональд Трампнинг металларга божхона тарифлари жорий этгани сабаб бўлган. Шунингдек, инвесторлар АҚШ иқтисодиётининг истиқболларини ва Федерал Резерв тизимининг (FRS) фоиз ставкалари бўйича қарорларини қайта баҳоламоқда.

Трамп томонидан пўлат ва алюминий импортига жорий этилган божлар 12 март куни кучга кириб, экспортга таянадиган Осиё мамлакатларида хавотир уйғотди ҳамда Европа Иттифоқи ва Канада томонидан зудлик билан жавоб чораларининг кўрилишига олиб келди.

IG Group компаниясининг бозордаги стратегик таҳлилчиси Йип Жун Ронгнинг сўзларига кўра, савдо кескинлиги ортиши кутилаётганлиги сабабли инвесторлар таваккалчиликлардан қочмоқда. Шунинг учун улар волатил бозор шароитида хавфсиз актив сифатида олтинни сотиб олишга қайтаётгани кузатилмоқда.

Жаҳон Олтин кенгаши (World Gold Council) ҳисоб-китобларига кўра, ўтган йилда олтин нархи 40 мартадан ортиқ рекорд янгилаган. Бунга йирик марказий банкларнинг фоиз ставкаларини пасайтириши, Яқин Шарқ ва Шарқий Европадаги геосиёсий кескинликнинг кучайиши, АҚШ президентлик сайловларининг ноаниқлиги ва марказий банкларнинг олтинни фаол сотиб олиши сабаб бўлган. 2024 йилда олтин 27 фоизга қимматлаб, энг даромадли хомашёлардан бирига айланган.

Австралиянинг Macquarie инвестиция банки таҳлилчиларига кўра, олтиннинг нархи 2025 йилнинг учинчи чорагида унцияси учун 3500 долларга етиши мумкин. Банк мутахассислари бундай оптимистик прогнозни инвесторлар, жумладан давлат тузилмалари томонидан кредит ва контрагент хавф-хатарларини хеджлашга (таъминот чораларини кўришга) тайёрлиги ортгани билан изоҳлашмоқда.

Goldman Sachs банки эса олтиннинг 2025 йил охиридаги мақсадли нархини 3000 доллардан 3100 долларга оширди. Citigroup таҳлилчилари эса февраль ойида олтин уч ой ичида 3000 долларга етишини тахмин қилган эди, бироқ бу март ойидаёқ рўй берди.

Эслатиб ўтамиз, аввалроқ Ўзбекистон жорий йилнинг январь ойида 8 тонна соф олтин харид қилгани ва бу дунёда энг юқори кўрсаткич экани хабар қилинган эди. Натижада мамлакатнинг олтин захиралари 391 тоннага етиб, жами захираларнинг 82 фоизини ташкил қилмоқда.