Оқ уйда бутун дунёдан 11 нафар аёлга “Жасоратли аёллар” мукофоти топширилди

Америка Қўшма Штатлари Биринчи хоними Жилл Байден кеча, 8 март куни Оқ уйда халқаро “Жасоратли аёллар” мукофотини топшириш маросимида иштирок этди. Бу ҳақда “Америка овози” хабар берди.

Қайд этилишича, Биринчи хоним Жилл Байден Оқ уйда йиғилган бир гуруҳ аёлларга миннатдорчилик билдириб, эркакларни аёллар билан “шерик бўлишга” ва ўз ҳуқуқлари учун курашда уларни қўллаб-қувватлашга чақирди.

“Бизга гапиришга тайёр аёллар, тинглаш ва ҳаракат қилишга тайёр эркаклар керак. Бизга ўз оиласига ғамхўрлик қиладиган, уларни боқадиган, ўргатадиган, хавфсиз жамиятлар қурадиган эркаклар керак. Бизга ғамхўрлик, ҳамкорлик ва меҳрибонлик заифлик эмас, балки кучлилик белгиси эканлигини биладиган эркаклар керак”, деган Жилл Байден. 

Халқаро хотин-қизлар куни муносабати билан ўтказилган маросимда Жилл Байден ва Давлат котиби Энтони Блинкен Афғонистон, Аргентина, Марказий Африка Республикаси, Коста-Рика, Эфиопия, Иордания, Қозоғистон, Малайзия, Мўғулистон, Польша ва Украинадан 11 нафар совриндорга мукофотларни топширган.

Бу йилги мукофот соҳиблари орасида украиналик шифокор Юлия Паевская ҳам бор. У ўтган йили Мариупол Россия томонидан бомбардимон қилинганда жабрланганларни қутқариш бўйича ўз жамоасининг саъй-ҳаракатларини портатив тана камерасига ёзиб олган эди. Паевская тасвирларни қамалда бўлган шаҳардаги сўнгги халқаро ахборот жамоаси бўлган “Associated Press” агентлигига топширган. Журналистлар бу суратларни бутун дунёга тарқатган. Тез орада Паевская россияпараст кучлар томонидан ҳибсга олинган ва уч ой ҳибсда сақланган.

Шунингдек, қозоғистонлик ҳуқуқ ҳимоячиси Бахитжан Торегожина ҳам мукофот олган. У 2022 йил январь ойида Қозоғистонда содир бўлган тартибсизликлар билан боғлиқ қурбонларга ёрдам бериш ва инсон ҳуқуқлари бузилишини ҳужжатлаштириш билан шуғулланувчи “Қантар 2022” фуқаролик жамияти ташкилотлари коалициясини бошқарган.

Маълумот учун, мазкур мукофот 2007 йилда ўша пайтдаги АҚШ Давлат котиби Кондолиза Райс томонидан таъсис этилган. Мукофот тинчлик, адолат, инсон ҳуқуқлари, гендер тенглиги ҳамда аёллар ва қизларнинг ҳуқуқларини кенгайтиришда жасорат, куч ва етакчилик кўрсатган аёлларни тақдирлашни кўзлаган. Ташкил этилганидан буён 80 дан ортиқ мамлакатдан 180 дан ортиқ аёл мукофотга сазовор бўлган. Президент Байден мукофотни топшириш маросимини Давлат департаментидан Оқ уйга кўчирган.