Допинг сабаб футболдан четлатилган украиналик футболчининг дисквалификацияси бекор қилинди

Англия Футбол ассоциацияси (FA) “Челси” ярим ҳимоячиси Михаил Мудрикнинг допинг иши бўйича дисквалификациясини бекор қилди. Бу ҳақда ташкилот матбуот хизмати хабар берди.

Маълум қилинишича, томонлар Жаҳон антидопинг агентлиги (WADA) розилиги билан интизомий иш юритишни якунлаган. Суд жараёнида Мудрик допинг қабул қилганини тан олган. У келишувга мувофиқ, аввал ўтаган муддати билан чекланган дисквалификацияга рози бўлди. Шу тариқа, украиналик футболчи яна расман майдонга қайтиш ҳуқуқини қўлга киритди.

Эслатиб ўтамиз, 2024 йил декабрь ойида “Челси” Мудрикнинг допинг синовидан ўта олмаганини тасдиқлаган эди. Шундан сўнг, Англия Футбол ассоциацияси уни мусобақалардан четлатди. 2026 йил апрель ойида эса футболчи тўрт йилга дисквалификация қилингани ва иш Спорт арбитраж судига юборилгани маълум қилинган эди.

Мудрик сўнгги бор “Челси” сафида 2024 йил 1 декабрь куни Англия Премьер-лигасининг “Астон Вилла”га қарши учрашувида (3:0) майдонга тушган.

25 ёшли ярим ҳимоячи 2024-2025 йилги мавсумда турли мусобақаларда 15 та ўйинда иштирок этиб, 3 та гол урган ва 5 та голли узатмани амалга оширган. Умуман олганда, у “Челси” сафида 73 та учрашувда майдонга тушиб, 10 та гол ва 11 та голли узатма муаллифи бўлган.