“Мен диктатор эмасман”. Вучич энди сайловда қатнашмаслигини айтди

Сербия Президенти Александр Вучич ҳокимиятни сақлаб қолиш учун конституцияни ўзгартирмаслиги ва ўз номзодини қайта илгари суришни режалаштирмаётганини айтди. Бу ҳақда “Kurir” хабар берди.

Александр Вучичга кўра, келажакдаги президент сайловлари ҳам амалдаги қонунчиликка мувофиқ ўтказилади.

“Мен сиёсий ветеранман, энди ўз номзодимни илгари сура олмайман ва бунинг учун конституцияни ўзгартириш хаёлимга ҳам келмайди. Сизлар тасвирлагандек мен диктатор эмасман, бир ярим йилдан сўнг президентлик фаолиятимни якунлайман. Қилган ишларимдан фахрланаман”, деган Сербия раҳбари. 

Президентнинг ушбу сўзлари мамлакатда тўс-тўполон авж олган бир пайтда янгради. Кеча, 12 август куни тунги вақтда Врбаш ва Бачка-Паланка шаҳарларидаги ҳукмрон Сербия Прогрессив партияси офислари олдида норозилик намойишлари бўлиб ўтди. Иштирокчилар муддатидан олдин сайловларни талаб қилди, тартибсизликлар юз берди. Ички ишлар вазирлигининг маълумотига кўра, 16 нафар полициячи ва 52 фуқаро жароҳат олган.

Митинглар 2024 йилнинг 1 ноябрь куни Нови-Сад вокзалида бетон соябон қулаб, 16 киши ҳалок бўлган фожиа ортидан бошланган норозиликлар билан боғлиқ.

“Reuters” агентлигининг хабарига кўра, митингга ўн минглаб талабалар ва коррупцияга қарши чиқаётган фуқаролар йиғилган. Иштирокчилардан бири Никола Марчетич сўзга чиқиб, бу митинг халқ манфаатига хизмат қилмайдиган режимга қарши кураш эканини таъкидлаган.

Эслатиб ўтамиз, аввалроқ Сербиянинг Белград шаҳрида жойлашган марказий Славия майдонида талабалар мухолифат митингини ўтказиб, Президент Александр Вучичнинг истеъфосини ва муддатидан олдин сайловлар ўтказилишини талаб қилганди.