“Мактабгача таълим ва тарбия тўғрисида”ги қонун қабул қилинди

Ўзбекистон Республикаси Президенти Шавкат Мирзиёев кеча, 16 декабрь куни “Мактабгача таълим ва тарбия тўғрисида”ги Қонунни имзолади. 

Қонун билан, мактабгача таълим ва тарбия соҳасидаги давлат сиёсатининг асосий йўналишлари, шунингдек, мактабгача таълим ва тарбия олишга доир давлат кафолатлари аниқ белгилаб берилди.

Хусусан, давлат ҳар бир боланинг умумий ўрта таълим ташкилотига ўқишга киришидан бир йил олдин давлат мактабгача таълим ташкилотларида умумий ўрта таълимга мажбурий бир йиллик тайёргарликдан ўтишга бўлган ҳуқуқини кафолатлайди.

Қонунга мувофиқ, мактабгача таълим ташкилоти давлат ва нодавлат ташкилоти бўлиши мумкин.

Мактабгача таълим ташкилотлари қуйидаги турларда ташкил этилади:
•    умумий турдаги мактабгача таълим ташкилоти;
•    кўп тармоқли ихтисослаштирилган мактабгача таълим ташкилоти;
•    инклюзив гуруҳларга эга мактабгача таълим ташкилоти;
•    қўшма турдаги мактабгача таълим ташкилоти.

Қонун расмий эълон қилинган кундан эътиборан олти ой ўтгач кучга киради.

Эслатиб ўтамиз, ушбу қонун Ўзбекистон Республикаси Олий Мажлиси Сенатининг йигирма бешинчи ялпи мажлисида маъқулланган эди.