Макгрегор UFC’га қайтишини айтди

Икки дивизион собиқ UFC чемпиони, ирландиялик Конор Макгрегор лига билан кейинги жангига оид музокаралар олиб бораётганини маълум қилди. Бу ҳақда жангчи “Bloody Elbow” нашрига берган интервьюсида айтиб ўтди.

“Мен UFC билан жанг ҳақида музокаралар олиб бормоқдаман. Бу Оқ уйда ёки унинг яқин атрофида бўлиши мумкин. Шу ёзда қайтаман”, дейди жангчи.

2025 йил 4 июль куни Дональд Трамп АҚШнинг 250 йиллигини нишонлаш доирасида 2026 йил 14 июнда Оқ уй ҳудудида UFC тадбири ўтказилишини эълон қилган. Тадбирда саккиздан тўққизтагача чемпионлик жанглари бўлиб ўтиши кутилмоқда.

Маълумот учун, 37 ёшли Макгрегор 2021 йил июль ойида UFC 264 мусобақасида оёғидан жароҳат олгани сабабли америкалик Дастин Порьега техник нокаут билан мағлуб бўлганидан бери октагонда жанг қилмаган. Унинг ММА’даги фаолиятида умумий ҳисобида 22 та ғалаба ва 6 та мағлубият мавжуд.

Эслатиб ўтамиз, аввалроқ испаниялик жангчи Илия Топурия ирландиялик юлдуз Конор Макгрегорга қарши жанг қилиш истагини билдирганди.