Лукашенко ўзбекистонликларни Беларусда ишлаш ва яшашга таклиф қилди (видео)

Беларусда ишчи кучи тақчиллиги кузатилаётгани боис мамлакат Президенти Александр Лукашенко ўзбек оилаларини Беларусга кўчиб келиб, ишлаш ва яшашга таклиф қилди.

“Витебск вилояти ҳақида кўп гапирилди. Ўзбекистонда сув етишмайди. Ер ҳам кўпроқ бўлса яхши бўларди. Бизда, Беларусда, бунинг барчаси бор. Баъзан ишчи кучи етишмайди. Биз ўзбек оилалари Беларусга келиб, шу ерда жойлашишини, зарур бўлса, тиббий ёрдам олишини, таълим олиб, ривожланишини истардик. Бу Беларусь ерлари бўшаб қолмаслиги учун бизга жуда зарур”, деган у.

Лукашенко Беларусь ва Ўзбекистон ўртасидаги ҳамкорлик фақат иқтисодий йўналиш билан чекланиб қолмаслиги, ҳудудлараро алоқаларни ривожлантириш, илмий-техникавий, ижтимоий ҳамда маданий-гуманитар соҳаларда қўшма лойиҳаларни амалга ошириш муҳимлигини таъкидлаган.

Шунингдек, Беларусь раҳбари икки мамлакат мавжуд имкониятлардан фаолроқ фойдаланиши кераклигини таъкидлаган.

“Келинг, биргаликда ишлайлик. Беларуслар ўзбекларга жуда яхши муносабатда бўлади. Худди Ўзбекистон фуқаролари беларусларга яхши муносабатда бўлганидек. Президентларнинг иродаси ва қўллаб-қувватлаши бор. Тез ҳаракат қилиш керак. Кечиксак, бошқа биров келади”, дея қўшимча қилган у.

Лукашенко Беларусь–Ўзбекистон ҳамкорлигида аёлларнинг ҳам муҳим ўрни борлигини таъкидлаган. Унинг айтишича, икки давлат ўртасида аёллар бизнес-форуми йўлга қўйилган бўлиб, Беларусь бу ташаббусни бундан кейин ҳам қўллаб-қувватлайди. Шунингдек, у Ўзбекистон Биринчи хоними Зироат Мирзиёеванинг фаоллигини алоҳида эътироф этган.

Эслатиб ўтамиз, жорий йилнинг 9 июль куни бўлиб ўтган музокаралар якунида Ўзбекистон Республикаси Президенти Шавкат Мирзиёев ва Беларусь Республикаси Президенти Александр Лукашенко Стратегик шериклик муносабатларини ўрнатиш тўғрисидаги декларацияни имзолаган эди.