“Ливерпуль” Конатенинг кетишини эълон қилди

Франция миллий терма жамоасининг ҳимоячиси Ибраҳима Конате шартномаси якунига етгач, “Ливерпуль” клубини тарк этади. Бу ҳақда инглиз клубининг расмий сайти хабар берди. 

27 ёшли футболчининг “Ливерпуль” билан амалдаги шартномаси 30 июнь кунига қадар мўлжалланган.

Конате 2021 йилда Германиянинг “Лейпциг” клубидан “Ливерпуль” сафига қўшилган. Шу вақт давомида у мерсисайдликлар таркибида 183 та учрашувда майдонга тушиб, 7 та гол урди.

Француз ҳимоячиси клуб билан биргаликда Англия чемпионлиги, Англия кубоги ва Англия Суперкубоги соҳиби бўлган. Шунингдек, у икки марта Англия Лига кубогини қўлга киритган.

Маълумот учун, Ибраҳима Конате Франция миллий терма жамоаси сафида 27 та учрашув ўтказган. У жамоаси билан Жаҳон чемпионати кумуш медалларини қўлга киритган. Ҳимоячи АҚШ, Канада ва Мексикада бўлиб ўтадиган 2026 йилги Жаҳон чемпионати учун Франция терма жамоаси қайдномасидан ҳам ўрин олган.