“Леганес” футболчиси бола парвариши учун “декрет”га чиқмоқчи

Испаниянинг “Леганес” клуби футболчиси Хуан Крус профессионал футбол тарихида кутилмаган ва ноёб қарорга қўл уриши мумкин. Хавбек фарзандини парвариш қилиш учун “декрет” таътилига чиқишни режалаштирмоқда. Бу ҳақда “Marca” хабар берди.

Агар бу ростдан ҳам амалга ошса, бу профессионал футбол тарихида эркак футболчининг расмий равишда бола парвариши учун таътил олган илк ҳолати бўлади.

Маълумотларга кўра, Круснинг бу қарорида оилавий сабаблар билан бир қаторда трансфер масалалари ҳам бор. У ўзини “Райо Вальекано” клубига қўйиб юборишларини хоҳламоқда ва шу орқали “Леганес” раҳбариятига босим ўтказишга уринаётгани айтилмоқда.

Испания меҳнат қонунчилигида эркаклар ҳам бола парвариши учун таътил олиш ҳуқуқига эга. Бироқ профессионал спортда, айниқса, футбол оламида бундай амалиёт деярли кузатилмаган. Шу сабабли Хуан Круснинг қарори футбол жамоатчилигида катта резонанс уйғотиши кутилмоқда.

Мутахассислар таъкидлашича, агар футболчилар оилавий сабабларга кўра таътил олиш имкониятидан фойдаланишни бошлашса, бу футболчилар ҳуқуқларининг кенгайиши сари қадам бўлиши мумкин.

Эслатиб ўтамиз, ўтган йили Испаниянинг “Леганес” клуби ўзбекистонлик футболчи Лазизбек Мирзаев трансферини эълон қилган эди.

Жаҳонгир Болтабоев