Кушербоев истеъмолчилар ҳуқуқини бузаётган “UzAuto Motors”ни жазолашни талаб қилмоқда

Ўзбекистон Олий Мажлиси Қонунчилик палатаси депутати Расул Кушербоев мижозларига 4-позиция Chevrolet Cobalt’ни автомобиль ўриндиғини иситиш модулисиз етказиб беришни таклиф қилаётган “UzAuto Motors” АЖга қатор саволлар билан мурожаат қилди.

“UzAuto Motors” 4-позиция Chevrolet Cobalt’ни кутаётган мижозларга автомобиль ўриндиғини иситиш модулисиз таклиф этмоқда экан. Ушбу комплектация 1 млн сўмни ташкил этади ҳамда ушбу сумма мижозга қайтариб бериларкан”, дейди депутат.

Унинг сўзларига кўра, компаниянинг ушбу ҳаракатлари бир қатор саволларни келтириб чиқаради.

“Биринчи, истеъмолчига компания яримўтказгич топа олдими йўқми қизиғи йўқ. У ҳақини тўлаган вассалом.

Компания нега бошқа мамлакатлар автомобиль саноатига ўхшаб, аввал автомобилни ишлаб чиқариб кейин сотувга чиқармаяпти? Нега йўқ нарсага олдиндан пул олади?

Иккинчи, компаниянинг истеъмолчига кўрсатмаган хизмат ёки бермаган товари учун олдиндан ҳақ тўлаб ишлаши ҳалол ва қонунийми?

Учинчи, компания нуқсонли товар бергани ёки  истеъмолчига вақтида товарни бермагани учун неустойка(пеня) ҳам тўлаши керак. Бунинг ҳисоб-китоби борми?”, дейди Кушербоев.

Унинг таъкидлашича, “Истеъмолчиларнинг ҳуқуқларини ҳимоя қилиш тўғрисида”ги Қонуннинг 19-моддасида “Нуқсонлар белгиланган муддатда бартараф этилмаган, шунингдек, иш бажаришни (хизмат кўрсатишни) бошлаш ва тугаллаш кечиктирилган тақдирда, ижрочи истеъмолчи ҳар бир кечиктирилган кун, соат (агар муддат соатларда белгиланган бўлса) учун иш (хизмат) қийматининг ёки буюртма қийматини (агар унинг қиймати алоҳида белгиланмаган бўлса) бир фоизи миқдорида неустойка (пеня) тўлайди”, деган норма бор. 

“Оддий айтганда кимдир 100 млн сўмлик автомбилга пул тўлади-ю, автомобиль айтилган комплектацияда бўлмаса ёки вақтида харидорга етказиб берилмаса, ҳар ўтказиб юборилган кун учун унга 1 млн дан пул тўланади. Агар 100 кун кечикса, 100 млн тўлайди.

Айтганча шу қонун нормасини компанияга янги келган ҳорижлик бош директоргаям билдириб қўйишса яхши бўларди”, дейди депутат.

У юқоридагилардан келиб чиқиб, Монополияга қарши курашиш қўмитаси ҳузуридаги Истеъмолчилар ҳуқуқларини ҳимоя қилиш агентлигига айни ҳолатни ўрганиб, истеъмолчиларни ҳимоя қилиш масаласида расман сўров киритилганини қўшимча қилган.

“Истеъмолчиларга нисбатан бундай камситувчи муносабат учун Агентликдан кескин чора кутиб қоламиз. Судлар ҳам бу сафар истеъмолчи ҳуқуқига кўз юммас. Зеро Ўзбекистон – ҳуқуқий давлат!”, дея сўзини якулаган Расул Кушербоев.

Аввалроқ, “UzAuto Motors” эҳтиёт қисмлар танқислиги муаммоси юзага келгани учун мижозларига 4-позиция Chevrolet Cobalt’ни автомобиль ўриндиғини иситиш модулисиз таклиф этганди. Бунинг учун 1 млн сўм чегирма берилиши маълум қилинган.