Кореяда собиқ президент порахўрликда айбланди

Жанубий Корея прокуратураси собиқ президент Мун Чжэ Инни ўзининг собиқ куёвини Таиланд авиакомпаниясига ишга жойлаштиришга ёрдам бергани учун порахўрликда айблади. Бу ҳақда “Yonhap” хабар берди.

Прокуратуранинг билдиришича, 2017 йилдан 2022 йилгача президент лавозимида ишлаган Мун Чжэ Ин 2018 йилда ўзининг собиқ куёвини Таиланд авиакомпаниясида юқори маошли лавозимга қабул қилинишига ёрдам берган. Қайд этилишича, унинг куёви фақат оддий вазифаларни бажарган.

Хабарга кўра, бу собиқ президентга унинг қариндоши орқали авиакомпаниядан маош ва бошқа тўловлар кўринишида берилган пора шакли сифатида қаралади. 2018 йил августидан 2020 йил апрелигача ноқонуний олинган фойда суммаси тахминан 218 миллион вон (тахминан 152 000 доллар) миқдорида баҳоланмоқда.

“Шу муносабат билан прокуратура собиқ давлат раҳбарини ўта оғир жиноятлар учун жазолаш тўғрисидаги қонуннинг моддаси бўйича пора олишда иштирокчи сифатида айблади”, дейилади хабарда.

Шунингдек, собиқ президент ўз лавозимидан қизининг оиласини Таиландга кўчириш учун фойдалангани айтилмоқда.

“Аниқланишича, Президент маъмуриятининг Махсус инспекция гуруҳи орқали куёвни ишга жойлаштириш жараёни ҳам, Таиландга кўчиб ўтиши ҳам назорат қилинган”, дейилади хабарда.

Собиқ президентнинг қизи ва куёвига келсак, улар жавобгарликка тортилмаган, уларга нисбатан ҳибсга олинмасдан жиноий таъқибни тўхтатиш тўғрисида қарор чиқарилган.

Эслатиб ўтамиз, аввалроқ Жанубий Кореянинг яна бир президенти Юн Сок Ёль расман лавозимидан четлатилган эди. У ўтган йилнинг декабрь ойида мамлакатда ҳарбий ҳолат жорий қилишга уринган.

Шундан сўнг, парламент уни қўзғолонга уринишда айблаб, импичмент эълон қилди.  У қўзғолонга уриниш ҳақидаги айбловларни рад этиб, ўзининг қарорини “сиёсий жиҳатдан асосли” деб атаган ва у давлатни мухолифатдан ҳимоя қилиш учун қабул қилинганини таъкидлаган.