Конор Макгрегор президентликка номзодини қўймоқчи

Икки вазн тоифасида собиқ UFC чемпиони бўлган 37 ёшли Конор Макгрегор Ирландия президентлиги учун халқдан ўз номзодини қўллаб-қувватлашни сўради. Бу ҳақда спортчи бугун, 2 август куни Х саҳифасида ёзиб қолдирди.

Макгрегор ирландияликлардан унга овоз беришларини сўраб, ижтимоий тармоққа фойдаланувчиларига мурожаат қилиб чиққан. 

“Менинг молиявий имкониятларим чексиз, бу маблағлар бутун ҳаётимга етади. Бу эса шуни англатадики, мени ҳеч ким ҳеч қачон сотиб ола олмайди, ҳатто террорчилар билан ҳам мен ҳеч қачон музокара олиб бормайман. Агар сизлар мени Президент этиб сайласангиз, юртимизга туб ўзгаришлар ва шифо кириб келади. Албатта, бу сўзлар кимларгадир ғалати туюлиши мумкин, лекин бу – соф ҳақиқат. Ишонинг, мен сиз ўйлагандан ҳам кучлиман ва атрофимда ақлли ва кучли жамоа бор. Биз барча қийинчиликларни енгиб ўтамиз. Ирландиянинг келажаги учун фақат битта нарса керак – Конор Макгрегор учун овоз бериш!” дея ёзиб қолдирган у. 

Жорий йилнинг ноябрь ойида бўлиб ўтиши режалаштирилган президентлик сайловлари арафасида унинг номзоди ва берган ваъдалари ирландияликлар орасида асосий мавзулардан бирига айланган. 

Маълумот учун, 2025 йилнинг март ойи ўрталарида ҳам Макгрегор Ирландия президентлигига ўз номзодини илгари сурмоқчилиги ҳақида гапирганди. Макгрегор агар Ирландия Президенти этиб сайланса, Европа Иттифоқининг миграция пактига қаршилик қилиши ва Ирландияда ҳар бир киши ўз келажаги бўйича овоз ҳамда танловга эга бўлишига ваъда берган.

Эслатиб ўтамиз, жорий йилнинг 18 март куни Макгрегор Вашингтондаги Оқ уйга борганди ва АҚШ раҳбари Дональд Трамп билан учрашганди. Учрашув давомида дунёнинг энг бой инсони Илон Маск ҳам уларга шерик бўлган эди.