Ким ниҳоят аскарларини Курскка юборганини тан олди

Шимолий Корея Россиянинг Курск яқинида ўтган ҳарбий операцияда ўз ҳарбийларининг иштирокини илк бор расман тан олди. Бу ҳақда мамлакат етакчиси Ким Чен Иннинг баёнотига таяниб, Корея Марказий телеграф агентлиги хабар берди.

Қайд этилишича, Пхеньянда Курск вилояти учун жангларда ҳалок бўлган шимолий кореялик ҳарбийлар хотирасига “Жанговар шон-шараф монументи” қад кўтаради.

КХДР етакчиси Шимолий Корея Қуролли кучларининг бу операциядаги иштирокини “КХДР ва Россия ўртасидаги анъанавий дўстлик ва бирдамликни монолит тарзда мустаҳкамлаш учун муқаддас миссия” деб атаган.

“Вужудга келган уруш шароити КХДР ва Россия ўртасидаги “Ҳар томонлама стратегик шериклик тўғрисида”ги шартноманинг 4-моддасини амалда қўллашга мос келади”, дейилади хабарда.

Курск вилоятининг озод этилиши муносабати билан Ким Чен Ин барча шимолий кореялик аскарларни “адолат учун курашган қаҳрамонлар ва Ватаннинг шарафли вакиллари” деб атаган. У Пхеньянда тез орада КХДРнинг фахрли ўғиллари қаҳрамонлигини шарафловчи жанговар жасорат монументи барпо этилишини ва ҳалок бўлган жангчилар қабрларига Ватан ва халқ номидан абадий хотира гулчамбарлари қўйилишини ваъда қилган.

Маълумот учун, бунгача Россия Қуролли кучлари Бош штаби раҳбари Валерий Герасимов ҳам Курск минтақасидаги жангларда шимолий кореялик аскарлар иштироки ҳақида илк бор очиқ гапирган. У КХДР ҳарбий хизматчилари Украина Қуролли Кучлари бўлинмаларидан Курск вилоятини озод этишда сезиларли ёрдам кўрсатганини таъкидлаган.

Эслатиб ўтамиз, Россия ва Шимолий Корея 2024 йил июнь ойида “Ҳар томонлама стратегик шериклик тўғрисида”ги шартномани имзолаган эди. Ушбу шартнома икки давлат ўртасида ҳарбий иттифоқ тузишни назарда тутади.

АҚШ, Жанубий Корея ва Украина маълумотларига кўра, 2024 йил октябрь ойида Россияга 10 мингдан 12 минггача шимолий кореялик ҳарбийлар етиб келган. Улар Россия сафида Украинага қарши урушда иштирок этишга жалб қилинган. КХДР бўлинмалари Курск вилоятидаги жангларга ҳам жалб этилган.

2024 йил январь ойида Украина Президенти Владимир Зеленский Шимолий Корея урушда тахминан 4 минг нафар аскарини ўлик ва ярадор сифатида йўқотганини билдирган эди. Худди шундай баҳоларни ҳозирда Жанубий Корея Бирлашган штаб бошлиқлари қўмитаси ҳам тақдим этди.