Хитойда дунёдаги иккинчи йирик камёб ер металлари кони топилди

Хитойлик геологлар мамлакат жануби-ғарбида, Сичуань провинциясининг Маонюпин туманида йирик камёб ер металлари конини аниқлади. Бу ҳақда Хитой Марказий телевидениеси хабар берди.

Геология-қидирув ишлари давомида қўшимча 9,66–9,7 миллион тонна камёб ер оксидлари аниқланган, бу ҳудуд захираларини 300 фоизга оширган ва участканинг умумий тасдиқланган ресурслари ҳажмини қарийб 10,4 миллион тоннага етказган. Кўламига кўра, ушбу кон Ички Мўғулистондаги Баян-Обо конидан кейин дунёда иккинчи ўринни эгаллайди.

Камёб ер металларидан ташқари, Маонюпинда катта миқдорда флюорит (27,1–27,14 млн т) ва барит (37,2–37,23 млн т) захиралари ҳам топилган. Флюорит саноатда фторнинг асосий манбаи ҳисобланади, барит эса нефть қазиб олишда қўлланилади.

Маълумот учун, Хитой дунё камёб ер металлари бозорида ҳукмронлик қилмоқда. Жаҳон бўйича камёб ер металлари етказиб беришнинг қарийб 70 фоизи ва уларни қайта ишлашнинг тахминан 90 фоизи Хитой ҳиссасига тўғри келади.