Кеннедининг ўлдирилиши бўйича махфий ҳужжатлар эълон қилинди

АҚШ Миллий архиви мамлакатнинг 35-президенти Жон Кеннедининг ўлдирилиши бўйича ҳужжатларни ошкор қилди. Шунингдек, Кеннедининг укаси Роберт ва ҳуқуқ ҳимоячиси Мартин Лютер Кингнинг ўлдирилиши билан боғлиқ ҳужжатлар ҳам эълон қилинди. Ушбу ҳужжатлар АҚШ Миллий архиви сайтига жойлаштирилган.

Кеннедининг ўлдирилиши бўйича архивда 6 миллиондан ортиқ саҳифадан иборат ҳужжатлар, фотосуратлар, аудио ва видео ёзувлар ҳамда моддий далиллар мавжуд. Энди ушбу ҳужжатларнинг катта қисми жамоатчилик учун очиқ бўлиб, қолган қисми кейинчалик эълон қилинади. Баъзи маълумотлар ҳали рақамлаштириш жараёнидан ўтиши кераклиги архив сайтида қайд этилган.

Шунингдек, АҚШ Конгресси Вакиллар палатаси аъзоси Анна Паулина Луна февраль ойида федерал ҳужжатларни очиқлаш бўйича ишлар бошланганини маълум қилди. Унга кўра, Жон Кеннедининг ўлдирилиши билан бир қаторда, 2001 йил 11 сентябрь терактлари бўйича маълумотларни ҳам ошкор қилиш режалаштирилган. Луна ҳукуматнинг “ўнлаб йиллар давомида маълумотларни яширганини” таъкидлаб, америкаликлар ўз саволларига жавоб олишга ҳақли эканини билдирган.

Маълумот учун, АҚШнинг 35-президенти Кеннеди 1963 йил 22 ноябрьда Техасга сайловолди сафари чоғида Далласда ўлдирилган. Жиноят ортидан тузилган расмий комиссия бу Ли Харви Освальднинг иши деган хулосага келган ва ҳеч қандай кенг кўламли фитна бўлмаганини маълум қилган. Комиссия хулосасига кўра, ўқ Далласнинг марказий майдонида жойлашган мактаб дарсликлари омборининг олтинчи қаватидан отилган. У ердан телескопик кўринишга эга милтиқ ва ишлатилган патронлар топилган.

Эслатиб ўтамиз, ҳужжатларнинг эълон қилиниши ҳозирги АҚШ Президентининг фармони билан боғлиқ. Дональд Трамп бу ҳужжатларни ошкор қилиш тўғрисидаги қарорни жорий йил 23 январь куни имзолаганди.