Қозоғистонда ЛГБТ тарғиботчилари жиноий жавобгарликка тортилиши мумкин

Қозоғистоннинг Мажлис депутати (қуйи палата) Одил Жанбиршин мамлакатда ЛГБТни тарғиб қилишни тақиқлаш, шунингдек, бундай фаолият учун жиноий жавобгарлик жорий этишни таклиф қилди. Бу ҳақда у кеча, 30 июль куни Остона шаҳрида ОАВ билан бўлиб ўтган матбуот анжуманида сўз очди.

“Биз фақатгина тақиқ билан чекланмаслигимиз керак. Агар ушбу тақиқ бузилса ва ЛГБТ ижтимоий тармоқларда, оммавий ахборот воситаларида ёки бошқа билвосита усуллар билан тарғиб қилинса, менимча, фақат маъмурий эмас, жиноий жавобгарлик ҳам кўзда тутилиши керак”, деган депутат. 

Шунингдек, тадбирда ЛГБТнинг болалар ва ўсмирлар саломатлиги учун хавфи бўйича экспертлар ўтказган тадқиқот натижалари ҳам муҳокама қилинган. Тадқиқотда қатнашган қозоғистонликларнинг 89 фоизи ЛГБТ тарғиботига тақиқ қўйиш кераклигини билдирган.

“Бу ҳар кимнинг шахсий иши, бироқ уни оммавий ахборот воситалари ёки ижтимоий тармоқлар орқали тарғиб қилишга йўл қўйилмаслиги керак. Биз бир гуруҳ депутатлар ЛГБТ тарғиботига қарши нормаларни ишлаб чиқдик, аммо улар қабул қилинмади – чунки кўплаб норозиликлар бўлди”, деган Жанбиршин. 

Қолаверса, Одил Жанбиршин ўтган йили ЛГБТ тарғиботига қарши расмий петиция 10 кун ичида 50 мингдан ортиқ имзо тўплаганини ҳам эслатган. 

“Халқ бу ташаббусни қўллаб-қувватлади, махсус комиссия тузилди ва эндиликда олимлар ҳамда экспертлар бу тарғиботнинг зарарли томонларини очиқ кўриб туришибди”, дея қўшимча қилган депутат. 

Унинг айтишича, ЛГБТ тарғиботининг 73 фоизи ижтимоий тармоқлардаги контент орқали тарқалмоқда ва улар асосий тарғибот воситасига айланган.

“Женева декларациясида оила қадриятлари ва аёллар саломатлиги ҳақида айтилган. АҚШ ҳам айнан шу ҳужжатга таянган ҳолда ЛГБТга қарши қонун қабул қилган. Албатта, инсон ҳуқуқлари ҳимояланиши керак, лекин нега биз кўпчилик эмас, озчилик фикрини ҳимоя қилишимиз керак?” дея савол қўйган Жанбиршин. 

Эслатиб ўтамиз, жорий йилнинг 5 март куни Конгрессдаги нутқида АҚШ Президенти Дональд Трамп мамлакатда ва бутун дунёда “соғлом фикр инқилоби”ни эълон қилиб, АҚШда фақат иккита жинс – эркак ва аёл тан олинишини айтганди.