Қашқадарёда йўлдан чиқиб кетган поезд бўйича “Ўзбекистон темир йўллари” АЖ баёнот берди

Жорий йилнинг 30 апрель куни соат 21:25 да Тошгузар – Бойсун – Қумқўрғон темир йўлининг Оқработ – Чашмаиҳофизон темир йўл участкасининг 103 километрида (Оқработ станциясидан 8 км узоқликда) поезд ҳаракатининг ўнг томонида ер кўчкиси содир бўлди. Кўчки йўловчи поезднинг издан чиқиб кетишига сабаб бўлди. “Ўзбекистон темир йўллари” АЖнинг ҳодиса юзасидан баёнот тарқатди.

Маълум бўлишича, ер кўчкиси рўй берган пайтда ушбу участкадан №81-сонли Сариосиё – Тошкент йўналишдаги йўловчи поезди ҳаракатланаётган бўлган ва поезднинг 3 та вагони ҳаракатдан тўхтаган. Мазкур поезд ишчи-ходимлари (бригадаси) томонидан ўз вақтида амалга оширилган тезкор саъй-ҳаракатлари туфайли барча йўловчилар поезднинг қолган вагонларига кўчирилган ва жойлаштирилган. Қайд этиш жоиз, мазкур ҳолатда жабрланганлар бўлмаган. Барча буюм ва ҳужжатлар ўз эгаларига етказилган.

Соат 22:10 да №81-сонли поезд “Деҳқонобод” станциясига етиб келган. У ерда йўловчи поезди тўлиқ техник кўрикдан ўтказилган, шунингдек, йўловчиларни жойлаштириш мақсадида қўшимча иккита вагон уланган. Сариосиё – Тошкент йўналишдаги йўловчи поезди ўз манзилига етиб борган.

Шикастланган темир йўлнинг устки қисми тўлиқ таъмирланиб, пўлат излари тикланган ҳамда юк ташиш ва йўловчи поездларнинг ҳаракатланиши белгиланган тартибда йўлга қўйилган.

Ҳозирги пайтда, кўчки содир бўлган ҳудуд “Ўзбекистон темир йўллари” АЖ ходимлари томонидан назоратга олинган.

Ахборот-таҳлилий медиа марказининг изоҳига кўра, оммавий ахборот воситалари ва мессенжерларда тарқатилаётган фотосуратларда пўлат изларининг қайта тиклаш жараёни акс эттирилган.

Эслатиб ўтамиз, апрель ойида ҳам Деҳқонобод тумани Оқработ қишлоғи яқинидаги темирйўл чўккани, оқибатда поезд вагонлари осилиб қолгани ҳақида хабар берилган эди. Ўшанда йўл тинимсиз ёққан ёмғирлар оқибатида юмшаб, ўпирилган эди.