Исроилликлар 27-марта суд-ҳуқуқ ислоҳотига қарши қўзғалди

Исроил мухолифати кеча, 8 июль куни кечаси бутун мамлакат бўйлаб суд-ҳуқуқ ислоҳотларига қарши 27-марта ҳафталик оммавий норозилик намойишларини ўтказди. Бу ҳақда “Cursorinfo” хабар берди.

150 га яқин намойишларнинг энг каттаси анъанавий тарзда Тель-Авивдаги ҳукумат бинолари мажмуаси яқинида бўлиб ўтган.

Полиция матбуот хизматига кўра, намойишчилар жанубий йўналишда Аялон шоссеси бўйлаб ҳаракатланишни тўсиб қўйган. Намойиш чоғида иштирокчилар демократия тарафдори шиорларини айтиб, Исроил байроқларини кўтарган ва расмийлардан суд-ҳуқуқ ислоҳотини ўтказишни бас қилишни талаб қилган.
Ташкилотчиларга кўра, шаҳардаги норозилик акциясида 180 мингга яқин одам қатнашган.

Герцлия шаҳрида намойишчилар эса Бен Гурион ва Рав Кук кўчалари бурчагидаги шиналарга ўт қўйган.

Маълумот учун, жорий йилнинг 20 февраль куни Исроил парламенти суд-ҳуқуқ ислоҳоти тўғрисидаги қонун лойиҳасини биринчи ўқишда маъқуллаган. Март ойида Нетаньяху давом этаётган норозилик намойишлари ва эълон қилинган "Миллий фалаж ҳафтаси" иш ташлаши фонида қонун лойиҳасининг иккинчи ва учинчи ўқишини кечиктиришга рози бўлган ва мухолифат билан музокарага киришган.

Бироқ сўнгги бир неча ой давомида бу музокаралар муросага олиб келмаган. 14 июнь куни мухолифат вакиллари фақат судьяларни танлаш қўмитаси таркиби аниқлангач, муҳокамаларни давом эттиришларини маълум қилган. Экспертлар эса судьяларнинг тайинланиши ўнг қанот диний-консерватив ҳукумат томонидан илгари сурилаётган ислоҳотларнинг асосий масаласи, деб ҳисоблайди.

Танқидчиларнинг айтишича, Нетаньяху коалицияси сиёсатга ҳаддан ташқари аралашишда айблаётган мамлакат Олий суди ваколатларини атайлаб заифлаштиришни мақсад қилган. Ҳукуматга судьяларни тайинлашда кўпроқ ваколат берилиши, парламент эса Олий суд қарорларини оддий кўпчилик овоз билан бекор қилиши керак. Ташаббус мухолифлари бу чорани Исроил демократияси учун хавфли деб ҳисоблаб, миллий инқироз ҳақида огоҳлантирмоқда.