Исроил ва Сурия АҚШ ёрдамида алоқа каналини яратмоқда

Бугун, 7 январь куни Сурияда ички низолар кучаяётган бир паллада, АҚШ Давлат департаменти Сурия ва Исроил Вашингтон воситачилигида савдо, хавфсизлик ва разведка масалаларини мувофиқлаштириш учун платформа яратишга келишиб олди. Бу ҳақда “Deutsche Welle” хабар берди.

Қайд этилишича, Қўшма Штатлар воситачилигида Парижда Исроил ва Суриянинг юқори мартабали вакилларининг учрашувидан сўнг, келишмовчиликларни ҳал қилишга ва тушунмовчиликларнинг олдини олишга ёрдам берадиган платформа яратиш тўғрисида қарор қабул қилинган.  

Исроил Бош вазири Биньямин Нетаньяхунинг идораси ҳали бундай механизмнинг яратилишини аниқ тасдиқламаган. Бироқ бир баёнотида Исроилнинг Сурия билан иқтисодий ҳамкорлигини “иккала мамлакат манфаати учун” чуқурлаштириш зарурлиги билдирган.

2024 йил декабрь ойида Исроил қуруқликдаги кучлари 1973 йилдаги Йом-кипур урушидан бери биринчи марта Сурия ҳудудига очиқчасига кириб, қуролсизлантирилган чегара зонасини кесиб ўтди. Бунгача Исроил армияси “Голан тепаликлари жамоалари ва Исроил фуқароларининг хавфсизлигини таъминлаш учун” Сурия билан чегарадаги буфер зонасига ва уларни ҳимоя қилиш учун зарур бўлган бошқа бир қатор жойларга кучлар жойлаштирилишини эълон қилган.

Маълумот ўрнида, Сурия ва Исроил 1948 йилдан бери расман уруш ҳолатида. Исроил Мудофаа кучлари (ЦАХАЛ) Суриядаги нишонларга мунтазам равишда ҳужум қилади ва бу операцияларнинг мақсади қурол омборлари ёки ҳарбий техникани йўқ қилишни кўрсатиб беради.

АҚШ Давлат департаменти маълумотларига кўра, Исроил ва Сурия Парижда ўз вакилларининг учрашувидан сўнг узоқ муддатли хавфсизлик шартномалари устида ишлаш истагини тасдиқлаган, АҚШ эса буни олқишлаган.

Ўтган йилнинг сентябрь ойида Исроил ва Сурия чегара ҳудудида Сурия ва Исроил кучларининг мавжудлигини тартибга солувчи хавфсизлик шартномаси бўйича музокаралар олиб бораётганини эълон қилинганди.

Эслатиб ўтамиз, жорий йилнинг 5 январь куни Сурия делегацияси АҚШ воситачилигида Исроил билан музокараларга киришгани ҳақида хабар берилганди.