Ирландия ҳам Grok устидан текширувни бошлади 

Ирландия Илон Маскнинг Grok сунъий интеллекти ёрдамида яратилган жинсий тасвирлар бўйича кенг кўламли текширув бошлади. Бу ҳақда “Euronews” хабар берди.

Ирландия Маълумотларни ҳимоя қилиш комиссияси Х’нинг сунъий интеллект чат-боти Grok’га нисбатан шахсий маълумотларни қайта ишлаш ва уни зарарли жинсий тасвирлар ва видеолар, жумладан, болаларнинг тасвирларини ишлаб чиқариш салоҳияти бўйича расмий тергов бошлаганини маълум қилган.

Қайд этилишича, Илон Маск компанияси Европа Иттифоқидаги фаолиятини Ирландияда олиб борган. Агар у Европа Иттифоқининг “Умумий маълумотларни ҳимоя қилиш тўғрисида”ги низомини бузган бўлса, глобал даромадининг 4 фоизигача жарима тўлаши мумкин.

Grok ўтган йили “Аччиқ режим” деб номланган функцияни яратганидан сўнг танқидга учраган. Бу функция фойдаланувчиларга чат-ботни аёлларнинг расмларини ечишга ва ҳеч қандай розилик ёки ҳимоя чораларисиз сунъий интеллект файллар яратиш имконини берган.

Таҳлилларга кўра, Grok кўпинча фойдаланувчилар ундан вояга етмаганлар тасвирланган жинсий мазмундаги расмлар яратишни сўраганда, бунга рози бўлган. Ҳатто 14 ёшли актрисанинг тасвирини яратиш ҳолати ҳам қайд этилган. Бу эса дунё бўйлаб назорат қилувчи органларда жиддий хавотир уйғотган.

Европа Комиссияси жорий йилнинг январь ойида Grok’га қарши расмий тергов бошлаган. Шу билан бирга, Буюк Британия ва Франция каби бошқа давлатлар ҳам Grok’га қарши судга даъво қилиш билан таҳдид қилиб, тергов бошлашини маълум қилган.

Х бунга жавобан Grok’нинг бундай тасвирларни ишлаб чиқаришини тўхтатиш учун чекловларни эълон қилган. Аммо хабарларга кўра, тасвирлар ишлаб чиқарилиши давом этган.

Эслатиб ўтамиз, аввалроқ Европа Комиссияси, Интерпол ва кўплаб ташкилотлар сунъий интеллектнинг яланғочлаш воситаларини тақиқлашга чақиргани ҳақида хабар берилганди.

Жавоҳир Алиқулов