Интернет тезлиги бўйича рейтинг эълон қилинди. Ўзбекистон нечанчи ўринда?

Ўзбекистон Speedtest Global Index интернет тезлиги рейтингидаги ўз позицияларини яхшилади. Жорий йилнинг август ойида мамлакат ҳам мобил, ҳам симли интернет йўналишида бирданига уч поғонага кўтарилди.

Маълумотларга кўра, мобил интернетда маълумотларни юклаб олишнинг ўртача тезлиги бир ой ичида 62,42 дан 65,27 Мбит/сониягача ошган. Бу Ўзбекистонга жаҳон рейтингида 75-ўриндан 72-ўринга кўтарилиш имконини берган. Беш йил ичида мамлакат мобил интернет тезлиги бўйича 65 поғонага юқорилаган.

Шу билан бирга, 2026 йил бошидан бери мамлакатда мобил интернет сезиларли даражада тезлашган. Саккиз ой ичида ўртача юклаб олиш тезлиги 27 фоизга – 51,42 дан 65,27 Мбит/сониягача ўсган.

Симли тармоқларда ҳам ўсиш қайд этилган: кўрсаткич 94,23 дан 94,50 Мбит/сониягача ортган. Натижада 2025 йилнинг декабрь ойидаги маълумотлар билан солиштирганда, Ўзбекистон дунёда 76-ўриндан 73-ўринга кўтарилган.

Speedtest Global Index томонидан тақдим этилган маълумотларга кўра, Марказий Осиё мамлакатлари тармоқларнинг турлича ривожланиш даражасини кўрсатмоқда. Мобил интернет тезлиги бўйича минтақада Қозоғистон етакчилик қилмоқда (56-ўрин), симли интернет сегментида эса етакчиликни Ўзбекистон сақлаб турибди (72-ўрин). Тажикистон 85-ўриндан жой олган, Туркманистон бўйича эса маълумотлар мавжуд эмас.

Инфраструктурага киритилган кенг кўламли инвестициялар ва 5G тармоқларининг ҳамма жойда қамраб олинганлиги туфайли, шоҳсупанинг барча юқори ўринларини Форс кўрфази мамлакатлари (БАА, Қатар, Қувайт) эгаллаб турибди.

Эслатиб ўтамиз, аввалроқ Ўзбекистонда 10 ёш ва ундан катта аҳолининг 97,3 фоизи интернетдан фойдаланаётгани маълум бўлган эди.