Ички туризмни рағбатлантирувчи субсидиялар миқдори тасдиқланди

Жамият

image

Авиаташувчиларга Ўзбекистондаги ички авиақатновлар чипта нархларининг 25 фоизи ҳамда туроператор ва турагентлар томонидан маҳаллий сайёҳлар учун ташкил этилган турларга авиа- ва темирйўл чипталари нархининг 15 фоизи миқдорида субсидиялар ажратиладиган авиа ва темирйўл йўналишлари белгиланди. Бу ҳақда Ўзбекистон Туризм ва спорт вазирлиги Матбуот хизмати хабар бермоқда.

Қайд этилишича, махсус комиссия томонидан субсидияланадиган 10 та авиақатнов йўналиши чипта нархларининг энг юқори суммалари ҳам тасдиқланган. Мисол учун, “Самарқанд-Наманган” авиақатновидаги чипта нархи 666 782 сўмни ташкил этган бўлса, авиаташувчига бериладиган субсидия ҳисобига ушбу чипта нархининг энг юқори суммаси 500 086 сўмни ташкил этди. Чипта туроператор орқали харид қилинганда эса унинг нархи 425 073 сўмни ташкил қилади.

Туроператорлар ва турагентлар томонидан тур доирасида харид қилинган “Андижон-Хива-Андижон”, “Термиз-Қарши-Хива” ва “Термиз-Қарши-Самарқанд” йўналишлари субсидияланадиган йўналишларга киритилди.

Шу билан бирга, Махсус комиссия қарорига мувофиқ Вазирлар Маҳкамасининг 2012 йил 13 апрелдаги 109-сон қарорида назарда тутилган жамоавий чипталарни сотиб олиш гуруҳидагилар сони 10 нафардан 24 нафаргача бўлганда – 10 фоизли, 25 ва ундан ортиқ кишилик гуруҳ учун эса 15 фоизли чегирмалар ҳам сақланиб қолинди.

Махсус комиссия қарорига кўра, Ўзбекистон Республикасининг Табиий монополиялар тўғрисидаги қонуни ҳамда Вазирлар Маҳкамасининг 2019 йил 3 декабрдаги 964-сон қарорига асосан йўловчи поездлари чипта нархларига (тарифлар) ўзгариш киритилган тақдирда бу тўғрисида “Ўзбекистон темир йўллари АЖ, Туризм ва спорт вазирлигининг расмий сайтлари ҳамда бошқа ОАВ ва ижтимоий тармоқларда кенг эълон қилиниб борилиши белгиланди.

Шунингдек, қарор билан республика бўйлаб жойлаштириш воситаларининг меҳмонхона хизматлари нархларининг субсидияланадиган энг юқори (чекланган) даражаси (суммаси) 250 минг сўм этиб тасдиқланди.

Бунда туроператор ва турагент томонидан Республика бўйлаб ташкил этилган тур давомида меҳмонхона хизматининг 10 фоиз миқдоридаги субсидияланадиган энг юқори суммаси 25 минг сўмдан ошмаслиги белгиланди.

Президентнинг ички ва зиёрат туризмини ривожлантириш тўғрисидаги Фармонининг имзоланиши Фарғона водийсида истиқомат қилувчи аҳолининг ҳам Бухоро, Самарқанд ҳамда Хоразм вилоятларига, ушбу ҳудудлар аҳолисини эса Фарғона водийсига саёҳат қилишлари учун қулай имконият тақдим этди.

Хусусан, жорий йилнинг февраль ойида йўлга қуйилган «Урганч-Фарғона-Урганч» авиайўналишининг биринчи ойида самолётларнинг бандлиги 43,7 фоизни ташкил этган бўлса, туроператор ва турагентларга яратилган қўшимча имконият натижасида самолётлар бандлиги март ойида 87,9 фоизга, яъни икки баробарга ошди.

Эслатиб ўтамиз, Ўзбекистон Республикаси Президентининг 2021 йил 9 февралдаги 6165-сон Фармонига мувофиқ юқоридаги субсидиялар бўйича тўловлар 2021 йил 1 мартдан бошлаб ташкил этилган саёҳатлар учун қоплаб берилади.


Мақола муаллифи

Теглар

Баҳолаганлар

21

Рейтинг

3.3

Мақолага баҳо беринг

Дўстларингиз билан улашинг