Freestyle Chess Grand Slam Finals. Жавоҳир Синдоров саралашни 1-ўринда якунлади (видео)

Кеча, 8 декабрь куни Жанубий Африка Республикасининг Кейптаун шаҳрида дунёнинг кучли гроссмейстерлари иштирокида мукофот жамғармаси 660 000 долларни ташкил этувчи Freestyle Chess Grand Slam турнирининг саралаш баҳслари якунланди. Унда жаҳон кубоги соҳиби Жавоҳир Синдоров 1-ўрин билан саралаш баҳсларини якунлади.

Яқиндагина Жаҳон Кубоги соҳиби бўлган Жавоҳир Синдоров ушбу саралаш баҳсларида 1-турда жаҳон рейтинги пешқадами норвегиялик Магнус Карлсенни мағлуб этганидан кейин эронлик Парҳам Мақсудлу ҳамда рейтингда ўзидан юқорида турган америкалик Фабиано Каруанани ҳам енгишга муваффақ бўлди. Ҳиндистонлик Аржун Эргаиси билан дуранг ўйнади. Уч ғалаба ва бир дуранг қайд этиб, 5,5 очко жамғарган ҳолда, 1-ўринни эгаллади.  Энди Жавоҳир Синдоров чорак финалдаги Парҳам Магсдоглуга қарши дона суради.

Эслатиб ўтамиз, аввалроқ Ҳиндистоннинг Гоа шаҳрида шахмат бўйича Жаҳон кубоги ўз якунига етганди. Унда ўзбекистонлик шахматчи Жавоҳир Синдоров Жаҳон кубоги ғолиблигини қўлга киритганди. Президент Шавкат Мирзиёев эса Жавоҳир Синдоровга Президент совғаси – 3 хонали хонадон ва “Ўзбекистон Республикасида хизмат кўрсатган спортчи” фахрий унвонини, унинг мураббийларига эса пул мукофотларини топширганди.