Францияда кучли довул оқибатида юз минглаб уйлар электрсиз қолди (видео)

“Бенжамин” довули Франциянинг саккизта минтақасида поездлар қатновида узилишларга сабаб бўлди, шунингдек, қарийб 140 мингта уй электр таъминотисиз қолди. Бу ҳақда бугун, 23 октябрь куни BFMTV хабар берди.

Қайд этилишича, кучли шамол тезлиги 100-130 км/соат, баъзи жойларда эса 160 км/соатгача етган. Мамлакатнинг 19 та департаментида “тўқ сариқ” даражадаги об-ҳаво огоҳлантириши эълон қилинган. Электр таъминотидаги муаммоларга қўшимча равишда темирйўл қатновида ҳам узилишлар кузатилган.

Хусусан, темирйўл ҳаракати билан боғлиқ муаммолар Франциянинг ғарбий, шимолий ва марказий ҳудудларига таъсир кўрсатган. Энг жиддий носозликлар Нормандия, шунингдек Бретань, Янги Аквитания ва Прованс – Алп – Лазур соҳилида қайд этилган. Поездлар ҳаракати О-де-Франс, Бургундия – Франш-Конте, Овернь – Рона – Алп ҳамда Марказ – Луара водийси минтақаларида ҳам тўхтаб қолган, айрим рейслар эса бекор қилинган.

Бундан ташқари, кучли шамол мамлакат бўйлаб кенг кўламли электр узилишларига сабаб бўлган. Жумладан, Францияда қарийб 140 мингта уй электр таъминотисиз қолган.

Эслатиб ўтамиз, аввалроқ Франциянинг Вал д’Оаз департаменти ҳудудида кучли бўрон ва торнадо кузатилганди. Оқибатда Эрмон, Обонн ва Франконвиль туманларида катта зарар етган. Префектура маълумотларига кўра, ҳодиса оқибатида бир киши ҳалок бўлган, тўрт киши эса оғир тан жароҳати олган.