Эрон ва Исроил ҳужумларни тўхтатди (видео)

Эрон ва Исроил кеча, 8 июнь куни АҚШ Президенти Дональд Трампнинг чақириғидан сўнг бир-бирига қарши ҳужумларни тўхтатганини маълум қилди. Бу ҳақда “Reuters” ахборот агентлиги хабар берди.

Манбанинг билдиришича, Исроил ҳам Эронга қарши ҳужумларни тўхтатишга қарор қилган. Бироқ Теҳрон Исроил Ливандаги “Ҳизбуллоҳ” ҳаракатига қарши зарбаларни давом эттирса, ҳарбий ҳаракатлар қайта бошланиши мумкинлигидан огоҳлантирди.
Трампнинг айтишича, Исроил ҳам, Эрон ҳам зудлик билан ўт очишни тўхтатишни истамоқда.

“Тинчлик бўйича якуний музокаралар давом этмоқда. Фақат жоҳиллик ёки аҳмоқлик уларга тўсқинлик қилиши мумкин”, деб ёзган у ижтимоий тармоқда.

АҚШ ва Исроил расмийлари Трамп ва Исроил Бош вазири Биньямин Нетаньяху 8 июнь куни телефон орқали мулоқот қилганини маълум қилган. Axios нашрида эълон қилинган интервьюда Трамп Нетаньяхуни огоҳлантирганини айтган. Унинг сўзларига кўра, агар Исроил раҳбари Эронга қарши урушни қайта бошласа, у яқин орада якка ҳолда курашишга мажбур бўлиши мумкин.

“Биби, эҳтиёт бўлганинг маъқул. Акс ҳолда жуда тез орада ёлғиз қоласан”, деб Исроил етакчисига айтганини билдирган Трамп.

Исроилнинг АҚШдаги элчиси Йехиэл Лейтер эса, Трамп Нетаньяхуга босим ўтказгани ҳақидаги хабарларни рад этган. У “Fox News” телеканалига берган интервьюсида икки раҳбар ўртасидаги мулоқот ҳамкорлик руҳида кечганини айтган ва журналистларни воқеаларни нотўғри талқин қилишда айблаган.

“Уларнинг қарийб 40 йиллик чуқур дўстлиги бор. Баъзан яқин инсонлар ўртасида ҳам баҳс бўлади, баъзан эса суҳбатдаги муҳит бироз кескинлашиши мумкин”, деган Лейтер.

Исроил ҳарбий амалдори мамлакат армияси операцияларни “қанча керак бўлса, шунча давом эттиришга” тайёрлигини билдирган. Эрон расмийлари ҳам шунга ўхшаш қатъий позицияни намоён қилган.
“Tasnim” агентлиги келтирган ҳарбий манбага кўра, Теҳрон узоқ давом этадиган можарога тайёр ва зарурат туғилса, минтақадаги АҚШ манфаатларига қарши ҳужумларни қайта бошлаши мумкин.

Маълумот ўрнида, сўнгги тўқнашувлар АҚШ ва Исроил жорий йилнинг 28 февраль куни бошлаган урушни тугатиш бўйича Трампнинг саъй-ҳаракатларини мураккаблаштирди. 8 апрель куни эълон қилинган ўт очишни тўхтатиш режими кенг кўламли жангларни тўхтатган бўлса-да, Форс кўрфази минтақасида вақт-вақти билан кескинлик сақланиб қолмоқда.

Эслатиб ўтамиз, аввалроқ Исроил Эроннинг жанубий-ғарбида жойлашган нефть-кимё мажмуасига, шунингдек бошқа ҳарбий нишонларга зарбалар уюштирган эди.