Эрон намойишчиларни ўлим жазоси билан қўрқитди

Эрондаги норозилик намойишларида иштирок этаётган айрим шахсларга нисбатан қатъий чоралар, шу жумладан ўлим жазоси ҳам қўлланилиши мумкин. Бу ҳақда Теҳрон прокурори Али Солиҳий маълум қилди.

Солиҳийнинг айтишича, жамоат ва давлат мулкига зарар етказган, шунингдек ҳуқуқ-тартибот ва хавфсизлик кучлари билан тўқнашувларга киришган намойишчиларга ўлим жазоси қўлланиши мумкин.

Унинг таъкидлашича, суд тизими учун энг муҳим масала – мамлакат фуқароларининг хавфсизлиги ҳисобланади. Солиҳий террорчилик ҳаракатларида айбланган шахсларга нисбатан “давлатга қарши уруш” моддаси қўлланилиши, Эрон қонунчилигига кўра, бу жиноятни содир этганлар ўлим жазосига маҳкум қилинишини алоҳида урғулаган. 

Маълумот учун, мамлакатда оммавий намойишлар 28 декабрдан буён давом этмоқда. Улар Теҳрондаги марказий бозорда бошланган бўлиб, кўплаб дўкон эгалари гиперинфляция ва нархларнинг кескин ошишига норозилик сифатида савдо шохобчаларини ёпган.

29 декабрь куни Эрон миллий валютаси – риял тарихий минимум даражага тушди: бир риял тахминан 0,00002 еврога тенг бўлди. Жаҳон банки маълумотига кўра, октябрь ойида Эронда озиқ-овқат инфляцияси 64,2 фоизни ташкил этган. Бу кўрсаткич бўйича мамлакатни антирейтингда фақат Жанубий Судан ортда қолдирган.

Эрон Миллий хавфсизлик олий кенгаши тартибсизликларни АҚШ ва Исроил томонидан уюштирилган, дея баҳолаган. 

Эслатиб ўтамиз, кеча, 9 январь куни Эрон Олий раҳнамоси Оятуллоҳ Али Хоманаий АҚШ Президенти Дональд Трампни огоҳлантирганди ва у барибир қулатилишини айтганди. У нутқида Эрондаги норозилик намойишлари ҳақида гапириб, мамлакатни беқарорлаштиришга уринаётган кучлар хориждан қўллаб-қувватланаётганини билдирган.