Эрон АҚШнинг эронликларга нисбатан “номақбул хатти-ҳаракатларини” қоралади

Эрон Ташқи ишлар вазирлиги матбуот котиби Исмоил Багай АҚШ ҳукуматининг муҳожирларга, жумладан Эрон фуқароларига нисбатан “ноўрин ва камситувчи” муносабатини қоралаб, буни асоссиз ва инсон ҳуқуқлари меъёрларининг бузилиши деб атади. Бу ҳақда “Mehr News Agency” хабар берди. 

АҚШ ҳукуматининг муҳожирларга нисбатан “ноўрин” муносабатига ишора қилиб, Багай халқаро меъёрларга риоя қилиш муҳимлигини таъкидлаб, АҚШ ҳукуматининг Эрон фуқароларига нисбатан “ғайриинсоний ҳаракатлари”ни “қабул қилиб бўлмайдиган” деб таърифлади.

Унинг таъкидлашича, Эрон Ташқи ишлар вазирлиги ўз ҳуқуқий мажбуриятларига мувофиқ, хориждаги Эрон фуқароларининг ҳуқуқларини ҳимоя қилиш учун барча зарур чораларни кўради.

Шунингдек, у Эроннинг Вашингтондаги Манфаатларни ҳимоя қилиш идорасига, шунингдек, Жанубий Америкадаги дипломатик ва консуллик ваколатхоналарига АҚШдан депортация қилинган Эрон фуқароларига ёрдам кўрсатиш бўйича кўрсатмалар берилганини таъкидлади.

“Эрон барча эронликларнинг ватани ва юртдошларимиз ўз ватанларига бемалол қайтишлари мумкин”, деди Багай.

У, шунингдек, Ташқи ишлар вазирлиги уларнинг қайтиши ва тегишли муаммоларни ҳал қилишга тайёрлигини яна бир бор таъкидлади.

Бу сўзлар 12 февраль куни Панамага Эрон, Афғонистон, Хитой, Ҳиндистон, Непал, Покистон, Шри-Ланка, Туркия, Ўзбекистон ва Вьетнамдан келган муҳожирларни олиб кетаётган биринчи рейс билан боғлиқ. 13 февраль кунги ҳафталик матбуот анжуманида Панама Президенти Хосе Рауль Мулино турли миллатлардан 119 киши келганини тасдиқлади.

Эслатиб ўтамиз, аввалроқ Америка Қўшма Штатлари мамлакатда рухсатсиз бўлиб турган ўзбекистонлик муҳожирларни Панамага депортация қилаётгани ҳақида хабар берилганди. АҚШнинг 13 февраль кунги баёнотида Панама Ташқи ишлар вазирлиги Трамп маъмурияти билан келишувга биноан АҚШга панамалик бўлмаганларни Марказий Америка мамлакатига депортация қилишга рухсат берувчи биринчи рейсни қабул қилганини тасдиқлаганди.