Эрдўған Путин билан Эрондаги урушни муҳокама қилди

Туркия Президенти Ражаб Тойиб Эрдўған Россия Президенти Владимир Путин билан телефон орқали суҳбатда Эрондаги урушни муҳокама қилди. Бу ҳақда Кремль хабар берди.

Қайд этилишича, томонлар давом этаётган қуролли тўқнашувлар нафақат минтақа, балки глобал миқёсда ҳам жиддий салбий оқибатларга олиб келаётганини айтган. Хусусан, энергия бозори, савдо алоқалари ва логистика тизимлари бу жараёндан зарар кўрмоқда.

Давлат раҳбарлари имкон қадар тезроқ ўт очишни тўхтатиш ва барча давлатларнинг қонуний манфаатларини инобатга олган ҳолда ўзаро мақбул тинчлик ечимларини ишлаб чиқиш зарурлигини қайд этган.

Мулоқот чоғида Украина атрофидаги вазият ҳам кун тартибидан ўрин олган. Путин Эрдўғаннинг музокаралар жараёнига кўмаклашишга доим тайёр эканини юқори баҳолаган. 

Шу билан бирга, Россия ва Туркияни боғловчи газ транспорт инфратузилмасига зарба беришга уринишлар фонида, томонлар минтақада хавфсизликни таъминлаш учун мувофиқлаштирилган чоралар кўриш муҳимлигини таъкидлаган.

Шунингдек, суҳбат давомида икки давлат ўртасидаги сиёсий, савдо ва иқтисодий ҳамкорликни кенгайтириш масалалари ҳам муҳокама қилинган. Хусусан, энергетика соҳасидаги қўшма стратегик лойиҳаларни амалга оширишни давом эттириш режалари кўриб чиқилган.

Эслатиб ўтамиз, аввалроқ Россия Президенти Владимир Путин Эрон Президенти Масъуд Пезешкиён билан телефон орқали суҳбатлашганди.