Чет элликларга Ўзбекистон паспортини пуллаган “паспорт стол” бошлиғи қамалди

Тошкент шаҳрининг Яккасарой туманидаги “паспорт стол” бошлиғи  чет эл фуқароларига Ўзбекистон фуқаролигини пуллагани учун 7 йилга қамалди. Бу ҳақда QALAMPIR.UZ манбаси хабар берди.

Билдирилишича, З.А. МЧЖ раҳбари Д.Ш. билан биргаликда 9 нафар чет эл фуқаросига Ўзбекистон Республикаси фуқароси ID картаси ҳамда хорижга чиқиш биометрик паспортини расмийлаштириб берган. Жиноий шериклар бунинг учун чет эл фуқароларидан 4 минг доллардан 15 минг долларгача пул маблағини олиб, ўзаро тақсимлаб олган.

Жумладан, З.А. 2022 йил ноябрь ойида Россия фуқароси К.Д.га ноқонуний тарзда ID карта ва “қизил паспорт” расмийлаштириб берган. У буни қуйидагича амалга оширган: мансаб ваколатини суиистеъмол қилган ҳолда ўзига бириктирилган “Е-калит” ёрдамида “Паспорт-виза” тизимига кирган ва аслида бошқа фуқарога тегишли бўлган фуқаролик паспортини К.Д.га тегишли бўлганлиги ҳақида қалбаки электрон ҳужжатни яратган. Сўнгра К.Д.нинг гўёки фуқаролик паспортини йўқотиб қўйганлиги ва ID карта расмийлаштириб бериш ҳақидаги аризасини олган. Шу тариқа К.Д.га Ўзбекистон Республикаси фуқаросининг ID картаси ҳамда хорижга чиқиш биометрик паспорти расмийлаштириб берилган.

Шунингдек, З.А. ИИВ МФРББнинг “Манзил” тизимига кириб, ҳеч қандай асослантирувчи ҳужжатлар мавжуд бўлмаса-да, К.Д.ни Тошкент шаҳрига доимий яшаш жойи бўйича рўйхатга қўйган.

З.А. жиноий шериги билан биргаликда айни шу усулда Россия, Қозоғистон ва Қирғизистон фуқароларига ID карта ҳамда хорижга чиқиш биометрик паспортларини расмийлаштириб берган.

З.А. буларнинг айримларини Яккасарой тумани ИИО ФМБ Миграция ва фуқароликни расмийлаштириш бўлими бошлиғи лавозимидан бўшатилганидан сўнг, ИИВнинг ҳар қандай электрон тизимлардан фойдаланиш ваколатига эга эмаслигига қарамасдан, ўзига бириктирилган “Е-калит”ни белгиланган тартибда топширмасдан амалга оширган.