Бугун “Сити” ва Ҳусанов “Лестер”га қарши саф тортади

Бугун, 2 апрель куни Англия чемпионати 30-тур ўйинлари давом эттирилади. Тур доирасида ўзбекистонлик ҳимоячи Абдуқодир Ҳусанов тўп тепаётган “Манчестер Сити” клуби ўз уйида “Лестер Сити”ни қабул қилади.

29 та турдан кейин шаҳарликлар турнир жадвалида 48 очко билан Европа Чемпионлар лигасига йўлланма берувчи охирги ўрин, 5-поғонани банд этиб турибди. 47 очкога эга “Ньюкасл” ва “Брайтон” “Манчестер Сити”нинг асосий таъқибчиси ҳисобланади.

“Лестер” эса элитада қолиш учун курашмоқда. 17 очкога эга бўлган тулкилар турнир жадвалида 19-ўринни банд этган ва қуйи лигага тушиб кетишга номзод бўлган асосий жамоалардан бири бўлиб турибди.

“Сити”нинг охирги ўйинида Пеп Гвардиола Ҳусановга бир тайм ўйнаш имкониятини тақдим этганди, чунки 21 ёшли ўзбекистонлик футболчи “Борнмут”га қарши Англия кубоги чорак финал ўйинининг биринчи бўлимида сариқ карточка олди ва “шаҳарликлар” устози 2-тайм бошида Ҳусанов ўрнига Нико О'Райлини майдонга туширди. Бугунги бўладиган ўйинда ҳам Ҳусановнинг асосий таркибда майдонга тушиш эҳтимоли юқори.

Маълумот учун, “Манчестер Сити” - “Лестер” ўйини Тошкент вақти билан 23:45 да старт олади. Учрашувга доимгидек шаҳарликларнинг уй стадиони ҳисобланмиш “Этиҳад” мезбонлик қилади.