Боласини мактабга бермаган мигрантлар Россиядан чиқариб юборилиши мумкин

Россия Президенти ҳузуридаги Фуқаролик жамияти ва инсон ҳуқуқлари бўйича кенгаш раиси Валерий Фадеев фарзандлари рус мактабларида ўқимайдиган меҳнат муҳожирларининг оилаларини чиқариб юборишга чақирди. Фадеевнинг баёноти кеча. 25 июнь куни кенгаш матбуот хизмати томонидан эълон қилинди.

Расмий маълумотларга кўра, Россия Ички ишлар вазирлиги Россия Федерациясида яшовчи 785 593 нафар “вояга этмаган хорижий фуқаролар”ни ҳисоблаган, аммо улардан фақат 192 254 нафари Россия муассасаларида таълим олаётганлар рўйхатига киритилган.

“Россия Федерациясидаги чет эллик болаларнинг умумий сони мактабгача ёшдаги болаларни ўз ичига олади”, дейди Фадеев.

Шунга қарамай, у қолган вояга этмаганларнинг камида 300 минг нафари рус мактабларида ўқиши керак, деб ҳисоблайди. Инсон ҳуқуқлари бўйича кенгаш раҳбари Россия Федерацияси Конституциясининг 43-моддаси ва Россия Федерацияси Оила кодексининг 63-моддасига ишора қилди. Унга кўра, Россия Федерациясида яшовчи барча ота-оналар фарзандларининг умумий таълим олишини таъминлашни талаб қилади.

“Худди шундай талаблар Тожикистон, Қирғизистон ва Ўзбекистонда ҳам амал қилади, бироқ бу давлатлардан Россия Федерациясига келган муҳожирлар фарзандларини мактабга юборишни шарт деб ҳисобламайдилар”, дейди Фадеев.

Унинг фикрича, бу “Россия ҳудудида бўлган юз минглаб болалар” ҳуқуқларини бузади.

“Агар чет эл фуқаролари қабул қилувчи давлат қонунларига риоя қилиш ниятида бўлмаса, улар ортга қайтсин, келиб чиққан давлати эса уларнинг фарзандларининг таълим олиш ҳуқуқини таъминлайди”, деди расмий.

Айни пайтда, Валерий Фадеев Россиядан болалари мактабга бормаётган меҳнат муҳожирларининг оилаларини чиқариб юборишга чақирар экан, фақат Тожикистон, Қирғизистон ва Ўзбекистон фуқароларини тилга олади. Ички ишлар вазирлиги келтирган маълумотлар эса Россия Федерациясидаги барча вояга этмаган хорижликларни қамраб олади.

Бундан ташқари, Россияда ота-оналар ҳақиқатан ҳам ўз фарзандларини умумий таълим билан таъминлашлари шарт бўлса-да, уларнинг фарзандларини тегишли муассасаларга топширишга мажбур қиладиган қонунлар йўқ. Шундай қилиб, Фадеевнинг ўзи назарда тутган Россия Федерацияси Оила кодексининг 63-моддасида айтилишича, ота-оналар фарзандлари учун умумий таълим шаклини танлайди. Россия қонунларига кўра, бундай шакллар ўз-ўзини тарбиялаш билан оилавий таълимни ҳам ўз ичига олади.

Бундай таълим шакллари танланган тақдирда, болалар фақат Россия таълим муассасаларида якуний аттестациядан ўтиш орқали ўз билимларини тасдиқлашлари керак бўлади.