БМТ Вашингтонни Кубага қарши санкцияларни бекор қилишга чақирди

БМТнинг инсон ҳуқуқлари бўйича эксперти Алена Доухан АҚШни Кубага нисбатан жорий этилган санкцияларни бекор қилишга чақириб, ўнлаб йиллар давом этган чоралар орол аҳолисига жиддий зарар етказишда давом этаётганини айтди. Бу ҳақда “Reuters” хабар берди.  

Унинг таъкидлашича, АҚШнинг савдо ва молиявий чекловлари мамлакатнинг кўплаб муҳим тармоқларига, жумладан, таълим, озиқ-овқат хавфсизлиги ва соғлиқни сақлашдан фойдаланишга таъсир қилади. Экспертнинг қўшимча қилишича, бу санкциялар “кенг кўламли халқаро ҳуқуқ нормаларига мос келмайди”.

БМТ вакилининг айтишича, бу чоралар зарур товарлар импортини чеклайди, давлат инфратузилмасини бошқаришни мураккаблаштиради ва Кубанинг аҳолининг асосий эҳтиёжларини қондириш қобилиятига тўсқинлик қилади. У, шунингдек, санкцияларнинг заиф гуруҳларга, жумладан, болалар, қариялар ва ихтисослаштирилган даволанишга муҳтож беморларга номутаносиб таъсирини қайд этди.

Куба расмийлари мунтазам равишда АҚШ санкцияларини қоралаб, Вашингтонни орол иқтисодиётини атайлаб бўғаётганликда айблаб келади. Қўшма Штатлар, ўз навбатида, бу чоралар Куба ҳукуматига инсон ҳуқуқларининг бузилиши ва ёмон бошқарув туфайли босим ўтказишга қаратилганини даъво қилмоқда.

Экспертнинг мурожаати аъзо давлатларга бир томонлама санкцияларнинг инсонпарварлик таъсирини камайтириш бўйича берилган тавсиялар туркумининг бир қисми бўлиб, БМТ уларни тинч аҳолига таъсири туфайли тобора кўпроқ ўрганмоқда.

Кубадаги иқтисодий вазият қандай?

2020 йилдан бери Куба иқтисодий ва энергетика инқирозини бошдан кечирмоқда, орол мамлакати инфляция, озиқ-овқат тақчиллиги ва электр токи узилиши билан бирга ялпи ички маҳсулот (ЯИМ) кескин пасайишига гувоҳ бўлди.

Куба расмийларининг таъкидлашича, инқироз COVID-19 пандемияси блокировкалари ва бошқа омиллар қатори АҚШнинг қаттиқ санкциялари давридаги иқтисодий қийинчиликлардан келиб чиққан.

АҚШнинг Кубага иқтисодий эмбаргоси ​​1960 йилда Фидель Кастро бошчилигидаги инқилоб диктатор Фульхенсио Батистани ҳокимиятдан ағдариб, АҚШ фуқаролари ва корпорацияларига тегишли мулкларни миллийлаштирганидан сўнг жорий қилинган.

Вашингтон Кубадаги муаммоларда коммунистик ҳукуматни айблайди

21 ноябрь куни “Reuters” ахборот агентлиги АҚШ Давлат департаменти вакилига таяниб, санкциялар Кубадаги вазиятга сабаб эмаслигини, аксинча мамлакатнинг коммунистик ҳукумати айбдор эканини ёзган.

“Эмбарго Кубанинг жаҳон бозорларига чиқишини ёки учинчи давлатлар билан савдо қилишни тақиқламайди. АҚШ қонунлари Кубага озиқ-овқат, дори-дармон ва тиббий асбоб-ускуналарни экспорт қилишга рухсат беради”, деди расмий.

АҚШ Президенти Дональд Трамп маъмурияти Кубага қарши санкцияларни кучайтирди ва Жо Байден президентлиги даврида қисқа муддатга олиб ташланганидан сўнг мамлакатни АҚШнинг терроризм ҳомийлари рўйхатига қайтарди.