Бекободда ака-ука 25 нафар вояга етмаган болага ноқонуний диний таълим бераётгани аниқланди

Тошкент вилоятининг Бекобод шаҳрида ака-укалар ўз хонадонларида жами 25 нафар вояга етмаган болага ноқонуний тарзда диний сабоқ бераётгани аниқланди. Бу ҳақда ЎзА хабар бермоқда.

Хусусан, Бекобод туманидаги масжидлардан бирининг имом-хатиби ўз уйида ҳар куни 5 нафар болани ўқитиб, улардан ойлик тўлов сифатида 800 минг сўмдан олган.

Унинг акасининг хонадонида эса 20 нафар бола ҳам яшаб, ҳам диний сабоқ олган. Бу манзилдаги болалар учун ойлик тўлов 1,5 млн сўмни ташкил этган. Шунингдек, мазкур шахс сабоқ бериш жараёнларига 21 ёшли ўғлини ҳам жалб қилган.

Ушбу болалар 2005–2015 йиллар оралиғида туғилган бўлиб, уларнинг кўпчилиги бошланғич синф ўқувчилари ҳисобланади. Болалар орасида нафақат бекободлик, балки, қўшни Бўка туманидан, Тошкент шаҳрининг Сергели туманидан, Сирдарё вилоятининг Ширин шаҳридан ҳамда Жиззах вилоятининг Шароф Рашидов туманидан келганлар ҳам бор.

Болалардан бири Бўка туманидаги умумий ўрта-таълим мактаби директорининг ўғли бўлиб, у 2020-2021 ўқув йилида мактабдаги дарсларга умуман қатнамаган.

Шунингдек, имом-хатибнинг акаси сабоқ бериш жараёнида вазифаларни ўзлаштирмаган болаларни калтаклаб, уларни оч қолдириш билан жазолаган.

Таъкидланишича, психолог томонидан болалар билан ўтказилган суҳбатда, уларнинг кўпчилиги ота-оналарининг хоҳиш-истаклари билан ўқишга келганликларини маълум қилишган.

Жиноят ишлари бўйича Бекобод шаҳар суди томонидан уч нафар шахснинг ноқонуний ҳаракатлари кўриб чиқилиб, уларга Ўзбекистон Республикаси Маьмурий жавобгарлик тўғрисидаги кодекснинг тегишли моддаларига кўра, базавий ҳисоблаш миқдорининг 7-8 баравари миқдорида жарима солинди. Шунингдек, имом-хатибнинг акасига 10 сутка маъмурий қамоқ жазоси ҳам тайинланди.