“Барселона” Шесни билан шартномани бекор қилмоқчи – ОАВ

Испаниянинг “Барселона” жамоаси раҳбарияти клуб дарвозабони Войцех Шесни билан шартномани бекор қилмоқчи. Бу ҳақда “Sport” хабар берди.  

Манбага кўра, томонлар 2025 йил ёзида шартномани янгилаш жараёнида футболчига тахминан 2 миллион евро тўлаш эвазига уни бекор қилиш имкониятини келишиб олган.

Маълумотларга кўра, 2 миллион евро польшалик футболчининг 2027 йил ёзигача амал қиладиган меҳнат шартномаси бўйича олиши керак бўлган маошдан камроқ.

Каталония клуби дарвозабонлар таркибини янгилаш устида ишламоқда. Агар каталонияликлар режалаштирилган ўзгаришларни амалга оширса, мавсум охирида Шесни билан ҳамкорликни якунлаши мумкин.

Маълумот учун, польшалик посбон 2024 йил октябрь ойидан бери “Барселона” сафида ўйнаб келмоқда. Шесни жорий мавсум барча мусобақаларда 9 та ўйинда майдонга тушиб, 17 та гол ўтказиб юборган. “Transfermarkt” маълумотларига кўра, Шесни бозор қиймати 900 минг еврони ташкил қилади.