Баку Тоғли Қорабоғни блокировка қилишни олдиндан режалаштирган – Расмий Ереван

Озарбайжон Тоғли Қорабоғда гуманитар инқирозни юзага келтириш учун уни тўсиб қўйишни олдиндан режалаштирган. Бу ҳақда Арманистон Ташқи ишлар вазири вазифасини бажарувчи Мнацакан Сафарян мамлакатда аккредитациядан ўтган хорижий дипломатлар билан учрашувда айтган. 

“Арманистон Ташқи ишлар вазири вазифасини бажарувчи Мнацакан Сафарян ўз нутқида Озарбайжоннинг сўнгги кунлардаги ҳаракатлари, жумладан, Лочин йўлагида бир қатор шунга ўхшаш ҳодисалар, ўт очишни тўхтатиш тартибини доимий равишда бузиш, Тоғли Қорабоғга газ етказиб беришда узилишлар содир бўлаётганини яққол кўрсатаётганини таъкидлади. Лочин коридорини қуриш Озарбайжон ҳукумати томонидан олдиндан режалаштирилган ва Тоғли Қорабоғда гуманитар инқирозни юзага келтиришга қаратилган”, дейилади ТИВ хабарида. 

Арманистон Ташқи ишлар вазирлиги Озарбайжоннинг бундай ҳаракатлари арман томонининг минтақада барқарорлик ва тинчлик ўрнатишга қаратилган саъй-ҳаракатларига путур етказишини таъкидлади. 

Жорий йилнинг 12 декабрь куни ўзини экологлар деб таништирган бир гуруҳ озарбайжонликлар Арманистон ва Тоғли Қорабоғни боғловчи ягона йўл бўлган Лочин йўлагини тўсиб қўйди. Ереван бу қадамни расмий Баку томонидан тан олинмаган республикада гуманитар фалокат яратишга қаратилган провокация сифатида баҳолади.

Озарбайжон нодавлат нотижорат ташкилотлари (ННТ) вакиллари Қорабоғ вилоятидаги Шуша-Лочин йўлида россиялик ҳарбийларнинг вақтинчалик назорати остидаги ҳудудларни кузатиш тақиқланганини қоралаган митингни ҳамон давом эттирмоқда. 

Фаоллар экологик террор, конлардан ноқонуний фойдаланишга қарши шиорлар айтмоқда, Россиянинг Қорабоғдаги ҳарбий контингенти қўмондони Андрей Волков билан учрашишни талаб қилмоқда.