Анджей Дуда Россияни “халқлар қамоқхонаси” деб атади

Польша Президенти Анджей Дуда этник озчиликлар Москва ҳукмронлигидан ажралиб, ўз давлатларини тузиши кераклигини даъво қилган ҳолда, Россияни “деколонизация”га чақирди. Бу ҳақда у Швецарияда ўтган тинчлик конференциясида сўз очди.

Дуда Россияни “халқлар қамоқхонаси” деб таърифлади ва унинг таркибидаги ўлкаларга ишора қилган ҳолда, Кремль ҳали ҳам “мустамлакачи”лик сиёсатидан воз кечмаганини айтди.

“Россия дунёдаги энг йирик мустамлакачи империя бўлиб қолмоқда. У Европа давлатларидан фарқли ўлароқ, ҳеч қачон деколонизация жараёнидан ўтмаган. Халқаро ҳамжамият аъзоси сифатида замонавий дунёда мустамлакачилик учун жой йўқ эканлигини айтишимиз керак”, дейди Польша раҳбари.

Маълумотларга кўра, Россия дунёдаги энг хилма-хил давлатлардан бири бўлиб, 270 дан ортиқ тил ва лаҳжаларда сўзлашадиган 190 дан ортиқ этник гуруҳларни ўз ичига олади.

Россия қўшни давлатда ҳарбий амалиёт бошлаганидан бери Польша Украинага ёрдам кўрсатишнинг энг очиқ тарафдорларидан бири бўлиб келган. Польша оммавий ахборот воситаларига кўра, Дуданинг Швецариядаги асосий вазифаси “Россия таҳдидининг кўламини таъкидлаш” эди.

Жорий йилнинг бошида Польша Бош вазири Дональд Туск ўз мамлакатига АҚШ ядровий қуролларини жойлаштиришга тайёрлигини билдирган. Москва эса буни “провокация” ва “чуқур душманлик сиёсати” деб атаганди.

Россия Президенти Владимир Путин Москванинг НАТО аъзоларига ҳужум қилиш нияти йўқлигини бир неча бор таъкидлаган ва бунинг акси ҳақидаги даъволарни “қўрқитиш тактикаси” сифатида рад этиб келади.