“Америкаликлар сотқин”. Эрон Ҳормуз бўғозини яна ёпиб қўйди

Бугун, 18 апрель куни Эрон АҚШ томонидан денгиз блокадаси давом эттирилаётгани сабабли Ҳормуз бўғози қайта ёпилганини эълон қилди. Бу ҳақда IRNA хабар берди.

“Хатам ал-Анбия” марказий қўмондонлиги расмий вакили АҚШ томонидан денгиз блокадаси давом этаётгани муносабати билан Ҳормуз бўғози қайта ёпилганини маълум қилган.

“Эрон Ислом Республикаси аввал эришилган келишувларга амал қилган ҳолда ва хайрихоҳлик кўрсатиб, Ҳормуз бўғози орқали чекланган миқдордаги нефть ва савдо кемаларини назорат остида ўтказишга розилик берган эди.

Бироқ америкаликлар яна бир бор сотқинлик кўрсатиб, блокада ниқоби остида қароқчилик ва денгиз талончилигини давом эттирмоқдалар. Шу муносабат билан Ҳормуз бўғози устидан назорат аввалги ҳолатига қайтарилди ва ушбу стратегик сув йўли Эрон Қуролли Кучларининг қаттиқ бошқаруви ва назорати остида қолмоқда”, дейди қўмондонлик вакили.

Марказий қўмондонлик вакили, шунингдек, АҚШ Эрондан чиқаётган ва Эронга кетаётган барча кемалар учун кема қатнови эркинлигини тўлиқ тикламагунча, Ҳормуз бўғозидаги вазият қатъий назорат остида ва аввалги тартибда қолишини таъкидлаган.

Эслатиб ўтамиз, кеча Эрон Ташқи ишлар вазири Аббос Арокчи Ҳормуз бўғози тижорат кемалари учун очилганини маълум қилган эди. Шундан сўнг АҚШ Президенти Дональд Трамп Эронга миннатдорлик билдирганди. Бироқ ўша куннинг ўзида АҚШ Президенти Ҳормуз бўғози очилганига қарамай, Қўшма Штатлар Эрон денгиз портлари блокадасини давом эттиришини маълум қилди.