АҚШда ўзбекистонлик йигит бир оилани гаровга олиб, уйини тунади

Америка Қўшма Штатларининг Нью-Йорк штатида 24 ёшли Ўзбекистон фуқароси эр-хотинни гаровга олиб, уларнинг уйи ва машинасини ўмарди. Бу ҳақда “The New York Post” хабар берди. 

Қайд этилишича, Р.З. исмли Ўзбекистон фуқароси жорий йилнинг 16 июль куни хитойлик шериги билан бирга Нью-Йоркнинг Квинс тумани Флашинг мавзесида ўзларини Федерал қидирув бюроси ходими сифатида таништириб, шу ҳудудда яшовчи эр-хотиннинг уйига бостириб кирган. Шундан сўнг, улар уй эгаларини боғлаб қўйиб, қурол билан таҳдид қилган ҳолда қўрқитган. Уларни бир неча соат давомида шундай ҳолда ушлаб туриб, уйини тунаган. 

“Кейин Р.З. ва шериги турли буюмлар, жумладан, кредит карталари, алоҳида буюртма бўйича тайёрланган сумкалар, қимматбаҳо заргарлик буюмлари, жабрланувчилардан бирига тегишли уяли алоқа мосламаси, жабрланувчиларнинг Mercedes-Benz автомобили калитлари ва тахминан 30 000 доллар миқдоридаги криптовалютани ўғирлаган”, дейилади хабарда.

Р.З. ва шериги уйни тунаб бўлгач, 15 дақиқалик таймер ўрнатган ва жабрланувчиларни бўшатиб, улар қочиб кетгунга қадар кутишни тайинлаган. Эр-хотин шу куни 23:00 да полицияга мурожаат қилган. 

Ўзбекистонлик йигит ўғирланган машинани ҳайдаб бориб, Манхеттендаги автотураргоҳга жойлаштирган. 19 июль куни у машинани олиб кетиш учун келган ва калитларни сўраб, тўхташ жойи ходимига мурожаат қилган. У автомобиль ўзиники эканини исботлаш учун сохта гувоҳномани ҳам кўрсатган. 

Полиция томонидан ҳибсга олинган Т.З. ва унинг шериги талончилик ҳамда ўзини федерал агентлар сифатида кўрсатишда айбланмоқда. Эндиликда уларга нисбатан 20 йилгача қамоқ жазоси тайинланиши мумкин. 

Эслатиб ўтамиз, аввалроқ Нью-Йоркнинг Бруклин туманида 17 ёшли ўзбекистонлик отиб ўлдирилган эди. Шунингдек, АҚШда дунёдаги энг адолатли судья номи билан танилган Френк Каприо ўзбекистонлик талабани машинасини белгиланмаган жойга қўйгани учун суд қилган эди.