АҚШ ва Украина урушни тугатиш масаласини муҳокама қилди

Украина Президенти Владимир Зеленский АҚШнинг махсус вакиллари Стив Уиткофф ва Жаред Кушнер билан “ижобий” суҳбат ўтказди. Бу ҳақда “Reuters” хабар берди.

Унинг айтишича, томонлар яқин ҳафталарда дипломатик жараённи фаоллаштириш ва Россия–Украина урушини тугатиш йўлларини муҳокама қилган.

Зеленский ижтимоий тармоқларда эълон қилган баёнотида АҚШ вакиллари ҳамкорликни кучайтиришга тайёр эканини таъкидлаган ва музокараларни “ижобий” деб баҳолаган.

Украина Президенти, шунингдек, Франция Президенти Эммануэль Макрон билан ҳам телефон орқали гаплашганини билдирган. Унда АҚШ вакиллари билан бўлган музокаралар ва келгусидаги дипломатик ҳаракатлар муҳокама қилинган.

Зеленскийга кўра, музокараларда Лондонда бўлиб ўтган учрашувлар ҳам тилга олинган. Унда Буюк Британия бош вазири Кир Стармер ва Германия канцлери Фридрих Мерц иштирок этган.

Унинг сўзларига кўра, ҳозир халқаро эътиборнинг катта қисми Эрон билан боғлиқ воқеаларга қаратилган бўлса-да, Европада тинчлик масаласи кун тартибида қолмоқда.

Шунингдек, томонлар АҚШ вакилларининг Киевга эҳтимолий ташрифи ва келажакдаги музокаралар истиқболлари ҳақида ҳам гаплашган. Агар ташриф амалга ошса, бу уларнинг Украинага илк расмий сафари бўлади.

БМТ Хавфсизлик Кенгашида ҳам урушни тўхтатиш бўйича музокараларни давом эттиришга чақириқлар янграган. БМТ вакиллари сўнгги кунларда Украинада тинч аҳолига зарар етаётганини, ҳужумлар кучайганини билдирган.

Шу билан бирга, Россия ва Украина ўртасида тўғридан тўғри музокаралар эҳтимоли ҳозирча рад этилгани ва томонлар позицияси кескинлигича қолаётгани қайд этилган.

Эслатиб ўтамиз, аввалроқ Украина Президенти Владимир Зеленский Россия Президенти Владимир Путинга очиқ мактуб йўллаб, тўғридан тўғри музокаралар жараёнини бошлаш ва давлат раҳбарларининг шахсий учрашувини ўтказишни таклиф қилган эди.

Шундан кейин Владимир Путин Украина Президенти Владимир Зеленскийнинг юзма-юз учрашув ўтказиш ҳақидаги таклифини рад этган.