АҚШ урушнинг бир йиллигига “совға” тайёрлади

АҚШ G7 давлатлари билан келишган ҳолда бугун, 24 февраль куни Россия Федерацияси ва учинчи давлатларнинг 200 дан ортиқ жисмоний ва юридик шахсларига нисбатан санкциялар жорий қилади. Бу ҳақда Оқ уй томонидан эълон қилинган баёнотда маълум қилинди.

“Бугун G7 ҳамкорлари ва иттифоқчилари билан келишилган ҳолда Ғазначилик ва Давлат департаментлари Россия иқтисодиётини янада заифлаштириш ва Украинага қарши уруш олиб бориш қобилиятини пасайтириш учун асосий даромад келтирувчи тармоқларга кенг қамровли санкциялар киритади. Чекловлар Россияда ҳам, Европа, Осиё ва Яқин Шарқдаги учинчи мамлакатларда ҳам Россиянинг ҳарбий саъй-ҳаракатларини қўллаб-қувватловчи 200 дан ортиқ жисмоний ва юридик шахсларга қарши қўлланади”, дейилади баёнотда.

Шунингдек, Оқ уй Россия Федерацияси томонидан босиб олинган ҳудудлардаги ўнлаб молия институтлари, россиялик амалдорлар ва ҳукумат мулозимларига нисбатан санкциялар жорий этилганини маълум қилган.

“Биз Россиянинг мудофаа ва технология саноати билан боғлиқ бўлган қўшимча шахсларга, шу жумладан Россиянинг санкцияланган товарлар захираларини тўлдириш ёки Россияга санкциялардан қочиш учун шароит яратишга масъул шахсларга нисбатан санкциялар қўямиз”, дейилган АҚШ маъмурияти хабарида.

Бундан ташқари, Оқ уй мазкур санкциялар Россия иқтисодиётининг металлургия ва тоғ-кон саноати соҳаларини ҳам қамраб олишини билдирган. Шунингдек, Қўшма Штатлар Россиянинг келажакдаги энергия имкониятлари бўйича чоралар кўриш ниятида экани, аммо бу қадамлар жорий ишлаб чиқаришга таъсир қилмаслиги ва бозор бузилишларини минималлаштиришга ёрдам бериши айтилган.

Экспорт чекловлари

АҚШ Президенти маъмуриятининг қўшимча қилишича, АҚШ Савдо вазирлиги санкцияларни четлаб ўтишга ёрдам бергани учун Россия, Хитой ва бошқа мамлакатларнинг 90 га яқин компаниясига экспорт чекловларини эълон қилади. 

“Бугун Савдо вазирлиги экспорт назорати бўйича қатор чора-тадбирларни амалга оширади, жумладан, Россиян ва Хитой каби учинчи давлатларнинг 90 га яқин компаниялари санкцияларни четлаб ўтиш ва Россия мудофаа секторини қўллаб-қувватлаш бўйича фаолият билан шуғулланувчи субъектлар рўйхатига киритилади”, дейилади хабарда.

Чекловлардан таъсирланган компанияларга Қўшма Штатларда ёки Америка технологиясида ишлаб чиқарилган ярим ўтказгичларни сотиб олишга рухсат берилмайди. АҚШ Савдо вазирлиги G7 даги иттифоқчилари билан биргаликда саноат ускуналари ҳамда ҳашаматли буюмлар соҳасида ҳам чора-тадбирларни мувофиқлаштириш ниятида. Бундан ташқари, АҚШ Эрон дронларидаги компонентларнинг Украинадаги жанг майдонига етиб боришига тўсқинлик қилувчи янги чекловлар жорий этади.

Алибек Бейжанов