АҚШ Мадуронинг оиласига санкциялар жорий қилди

Вашингтон Венесуэлага босимни кучайтираётган бир пайтда, Қўшма Штатлар кеча, 19 декабрь куни Президент Николас Мадуро, унинг рафиқаси ва оила аъзолари ҳамда шерикларига қарши санкциялар жорий қилди. Бу ҳақда “Reuters” агентлиги хабар берди.

АҚШ Молия вазирлиги Мадуро ва унинг рафиқаси билан боғлиқ етти кишига нисбатан санкциялар жорий этганини маълум қилди. Молия вазири Скотт Бессент уларни “Николас Мадуронинг ноқонуний гиёҳванд моддалар давлатини қўллаб-қувватлашда” айблади.

“Биз Венесуэланинг мамлакатимизни ҳалокатли гиёҳванд моддалар билан тўлдиришда давом этишига йўл қўймаймиз. Мадуро ва унинг жиноий шериклари яримшаримизнинг тинчлиги ва барқарорлигига таҳдид солмоқда. Трамп маъмурияти унинг ноқонуний диктатурасини қўллаб-қувватловчи тармоқларни нишонга олишда давом этади”, деди Бессент.

Мадуро ва унинг ҳукумати жиноятчиликка алоқадорлигини қатъиян рад этиб, АҚШ Венесуэланинг улкан нефть захираларини назоратга олиш учун уни ҳокимиятдан ағдаришга ҳаракат қилаётганини айтмоқда.

Сўнгги ойларда АҚШ Президенти Дональд Трамп маъмурияти Мадурога босимни кучайтириб, жанубий Кариб денгизида кенг кўламли ҳарбий тайёргарликни амалга оширмоқда. У минтақадаги гиёҳванд моддалар ташишда гумон қилинган кемаларга қарши зарбалар уюштирди, Венесуэла қирғоқлари яқинида санксияланган нефть танкерини мусодара қилди ва Венесуэлага кирувчи ва чиқаётган барча санксияланган нефть танкерларини “блокада” деб эълон қилди.

Трамп, шунингдек, Венесуэлада қуруқликка зарбалар яқин орада берилишини бир неча бор таъкидлаган.

Шу куни Мадуронинг рафиқаси Силия Флореснинг жияни Карлос Эрик Малпика Флореснинг қариндошларига қарши санкциялар жорий этилди. АҚШнинг таъкидлашича, Малпика Флорес PDVSA давлат нефть компаниясида коррупция фитнасига алоқадор бўлган. У ўтган ҳафта Вашингтон томонидан санкциялар остида қолди.

Эслатиб ўтамиз, аввалроқ Мадуро Трампдан истеъфога чиқиши эвазига пул ва бошпана сўрагани ҳақида хабар берилганди.