АҚШ Эронга қарши урушда Украинадан ёрдам сўради – Зеленский

Украина Президенти Владимир Зеленский Америка Қўшма Штатлари Украинадан Эрон дронларидан ҳимояланишда ёрдам сўраганини билдирди. Бу ҳақда у кеча, 5 март куни ўзининг Telegram-каналида маълум қилди.

Украина раҳбари Яқин Шарқда Эроннинг “Шахид” дронларига қарши курашда аниқ ёрдам кўрсатиш бўйича АҚШдан сўров олганини ёзди. Владимир Зеленский АҚШнинг ушбу илтимосига ижобий жавоб берган.

“Зарурий воситаларни тақдим этиш ва талаб даражасидаги хавфсизликни таъминлай оладиган украиналик мутахассислар иштирокини таъминлаш ҳақида топшириқ бердим. Украина ўз мамлакатимизга ёрдам бераётган, халқимиз ҳаётини ҳимоя қилаётган ҳамкорларни қўллаб-қувватлайди”, дейди Зеленский.

Эслатиб ўтамиз, аввалроқ Россия Президентининг матбуот котиби Дмитрий Песков Яқин Шарқдаги кескинлик ортиб бораётган бир вақтда, Россия Эрондан ёрдам кўрсатиш, жумладан, қурол-яроғ етказиб бериш бўйича ҳеч қандай мурожаат олмаганини айтган эди.