АҚШ Эронга қарши операциясида 65 млрд доллардан кўпроқ пул йўқотди

АҚШнинг Эронга қарши ҳарбий амалиётига сарфланган маблағ 65 миллиард доллардан ошиб кетди. Бу ҳақда реал вақтда ҳисоб-китоб юритувчи “ Iran War Cost Tracker” портали маълум қилди.

Маълумотларга кўра, операция бошланганига 59 кун бўлган ва шу вақт ичида харажатлар кескин ўсган. Ҳисоб-китоб методикаси Пентагоннинг Конгрессга тақдим этган ҳисоботига асосланган. Унда дастлабки олти куннинг ўзида 11,3 миллиард доллар сарфлангани, кейинги босқичларда эса, харажатлар кунига тахминан 1 миллиард долларга тенг бўлиши айтилган.

Портал умумий сарф-харажатларга ҳарбийлар таъминоти, минтақага юборилган кемалар ва бошқа операциявий харажатларни киритади.

Шу билан бирга, ОАВнинг маълум қилишича, Эрон АҚШга янги таклиф юборган. Унда Ҳормуз бўғозини очиш ва урушни якунлаш муҳокама қилиниши мумкин, аммо ядровий дастур масаласини кейинги босқичга қолдириш таклиф этилган.

Эрон Президенти Масъуд Пезешкиён эса, АҚШ ҳаракатлари ва дипломатия ҳақидаги баёнотлари ўртасида зиддият борлигини таъкидлаган.

Айрим америкалик сиёсатчилар эса, бу операцияни “кераксиз уруш” деб баҳоламоқда.

Эслатиб ўтамиз, аввалроқ АҚШ Президенти Дональд Трамп Эрон томонидан урушни якунлаш бўйича илгари сурилган таклифдан норози эканини билдирганди. Америкалик расмийларнинг фикрича, Ҳормуз бўғозини очиш масаласи ядро дастури, хусусан, уранни бойитиш ва захиралар билан боғлиқ муаммолар ҳал этилмасдан туриб кўриб чиқилса, бу АҚШ учун музокаралардаги асосий босим воситасини йўқотишга олиб келиши мумкин. Шу билан бирга, бўғоз блокадасининг давом этиши энергия нархларининг юқори бўлиб қолишига сабаб бўлмоқда.