Африкага Эбола қайтмоқда: Итурида 65 киши вирусдан ҳалок бўлди

Конго Демократик Республикаси шарқидаги Итури провинциясида Эбола вирусининг тарқалиши оқибатида 65 киши ҳалок бўлди. Бу ҳақда BBC хабар берди.

Африка Касалликларни назорат қилиш ва олдини олиш маркази маълумотларига кўра, ҳозиргача тахминан 246 та касалланиш ва 65 та ўлим ҳолати қайд этилган. Ҳолатлар асосан Монгвалу ва Рвампара олтин қазиб олувчи шаҳарларида кузатилган. 65 та ўлим ҳолатидан тўрттаси лабораторияда тасдиқланган ҳолатлар орасида қайд этилган.

Маълумот учун, Эбола биринчи марта 1976 йилда ҳозирги Конго Демократик Республикасида аниқланган бўлиб, вирус одамларга кўршапалаклардан юққани тахмин қилинган. Бу – мамлакатда ҳалокатли вирусли касалликнинг 17-марта авж олиши. У тана суюқликлари билан бевосита алоқа қилиш ва шикастланган тери орқали тарқалади, бу эса оғир қон кетишига ва органлар етишмовчилигига олиб келади.

Эболанинг дастлабки аломатлари иситма, мушак оғриғи, чарчоқ, бош оғриғи ва томоқ оғриғини ўз ичига олади. Ундан кейин қусиш, диарея, тошма ва қон кетиши кузатилади. Ҳозирча Эболага қарши тасдиқланган даво йўқ.

Жаҳон соғлиқни сақлаш ташкилоти маълумотларига кўра, ўртача ўлим даражаси тахминан 50 фоизни ташкил қилади.

Пойтахт Киншасадаги Биотиббий тадқиқотлар миллий институтида ўтказилган дастлабки тестларда Конго Демократик Республикаси Соғлиқни сақлаш вазирлиги ва Миллий жамоат институти билан маслаҳатлашувлардан сўнг таҳлил қилинган 20 та намунадан 13 тасида вирус аниқланган. Ҳозирда вируснинг штаммини аниқлаш учун тестлар ҳам ўтказилмоқда.

Айни пайтда Конго ҳукумати эпидемия расман авж олганини ҳали эълон қилмаган.

Эслатиб ўтамиз, айни вақтда дунё бўйлаб бошқа вирус – ҳантавирус ҳам тарқалмоқда.