Африка кубогининг энг яхшилари аниқланди

Сенегал терма жамоаси ҳужумчиси Садио Мане Марокашда бўлиб ўтган Африка кубогининг энг яхши футболчиси, деб эътироф этилди.

Турнир финалида Сенегал терма жамоаси қўшимча бўлимларда мезбон Марокашни 1:0 ҳисобида мағлуб этди. Асосий вақт якуни баҳсли воқеалар билан эсда қолди. Ҳакам қарорларидан норози бўлган айрим сенегаллик футболчилар майдонни тарк этган бўлса, орадан бир неча дақиқа ўтиб, жамоа сардори Садио Мане уларни яна майдонга қайтариб олиб чиқди.

33 ёшли ҳужумчи финал учрашувида гол ура олмаган бўлса-да, жамоанинг етакчи футболчиларидан бири сифатида майдонда фаол ҳаракат қилди. Мане турнир давомида Сенегалнинг барча еттита ўйинида иштирок этиб, икки гол муаллифига айланди.

Марокаш терма жамоасининг қанот ярим ҳимоячиси Браим Диас тўпурарлар жадвалида етакчилик қилгани учун “Олтин бутса” совринини қўлга киритди. У еттита учрашувда 5 та гол урди. Бироқ, финал баҳсида пенальтидан фойдалана олмади. Унинг зарбасини сенегаллик дарвозабон Эдуар Менди қайтаришга муваффақ бўлди.

Шунингдек, Марокаш дарвозабони Яссин Буну турнирнинг энг яхши посбони сифатида “Олтин қўлқоп” соврини билан тақдирланди. У мусобақа давомида жамоасининг барча еттита ўйинида майдонга тушиб, атиги 2 та гол ўтказиб юборди.

Мусобақа мезбони бўлган Марокаш терма жамоаси эса адолатли ўйин тамойилларига риоя қилгани учун “fair play” мукофотига сазовор бўлди.