Адейеми “Барселона” футболчисига айланди – Романо

Испаниянинг “Барселона” клуби Германия миллий терма жамоаси ҳужумчиси Карим Адейемини ўз сафига қўшиб олди. Бу ҳақда журналист Фабрицио Романо хабар берди.

Маълум қилинишича, каталонияликлар 24 ёшли футболчининг трансфери учун 22 миллион евро тўлаган. Томонлар ўртасидаги шартнома 2031 йил ёзига қадар амал қилади.

Адейеми 2022 йилдан буён Германиянинг “Боруссия Дортмунд” клуби шарафини ҳимоя қилиб келаётган эди. У шу вақт мобайнида жамоа сафида 146 та учрашувда майдонга тушиб, 36 та гол урди ва 25 та голли узатмани амалга оширди. Шу тариқа у дортмундликларнинг етакчи ҳужумчиларидан бирига айланган.

Аввалроқ “Bild” нашри Адейемининг “Боруссия Дортмунд”дан кетишига швейцариялик қиз рэпер Лоредананинг ҳам таъсири бўлганини хабар қилган эди. Манбага кўра, Лоредана Германиянинг саноат ҳудудида яшашни истамаган ва Европанинг йирик шаҳарларидан бирига кўчиб ўтишни хоҳлаган.

Шунингдек, хабарларда айтилишича, Адейеми янги клуб топиш мақсадида ҳатто агентини ҳам алмаштирган. Энди у фаолиятини “Барселона”да давом эттиради ва каталонияликлар ҳужум чизиғини Бундеслиганинг энг тезкор футболчиларидан бири билан кучайтирди.

Эслатиб ўтамиз, аввалроқ “Барселона” Энтони Гордонни 80 миллион евро эвазига ўз сафига қўшиб олган эди.