34 йил ичида илк бор Исроил ва Ливан етакчилари музокара ўтказади – Трамп

АҚШ Президенти Дональд Трамп Исроил ва Ливан етакчилари музокаралар ўтказишини эълон қилди. Бу ҳақда у кеча, 15 апрель куни ўзининг Truth Social ижтимоий тармоғидаги саҳифасида ёзди.

“Исроил ва Ливан ўртасида кичик танаффус яратишга ҳаракат қиляпмиз. Икки давлат етакчилари мулоқот қилганига анча вақт бўлди, тахминан 34 йил. Бу эртага содир бўлади. Ажойиб!” деб ёзди Трамп.

Ўтган ҳафта Исроил Бош вазири Биньямин Нетаньяху ҳукуматга Ливан билан имкон қадар тезроқ тўғрида тўғри музокараларни бошлаш ҳақида кўрсатма берганини маълум қилганди.

NBC News ва CNN хабарларига кўра, бундан олдин Америка етакчиси телефон мулоқотида Исроил Бош вазиридан Эрон билан тузилган нозик сулҳнинг бузилиб кетишига йўл қўймаслик учун Ливанга берилаётган зарбаларни камайтиришни сўраган. “Axios” нашрининг ёзишича, Исроил ва Ливан ўртасидаги тўғридан тўғри музокаралар келаси ҳафта Вашингтонда бошланади.

Эрон томони Ливанга бериладиган зарбаларни тўхтатиш икки ҳафталик сулҳ тўғрисидаги келишувнинг бир қисми эканини даъво қилган эди. АҚШ ва Исроил эса буни инкор этди. “Financial Times” маълумотларига кўра, Исроил ва Ливаннинг “Ҳизбуллоҳ” гуруҳи ўртасидаги ўт очишни тўхтатиш тартиби “яқин орада” эълон қилиниши мумкин. Газетанинг ливанлик манбалари бу ҳодиса “шу ҳафта” – катта эҳтимол билан Исроил армияси гуруҳнинг “муҳим таянч нуқтаси” бўлган Бинт-Жбайл шаҳрини назоратга олганидан кейин содир бўлишини инкор этмаган.

Эслатиб ўтамиз, аввалроқ Ливан ва Исроил расмий вакиллари Вашингтонда тўғридан тўғри музокаралар ўтказиш учун учрашганди. Бу расман уруш ҳолатида бўлган икки давлат ўртасида 1993 йилдан бери ўтказилаётган биринчи сиёсий музокара ҳисобланади.