30 йил олдин ўлган аёл тирик бўлиб чиқди

АҚШда 30 йилдан ортиқ вақт давомида бедарак йўқолган ва ҳатто расман ўлган деб ҳисоблаб келинган пенсильваниялик аёл Пуэрто-Рикода тирик ҳолда топилди. Бу ҳақда “The New York Times” хабар берди.

Қайд этилишича, 83 ёшли Патрисия Копта бедарак йўқолган жойидан 2700 километр узоқликдаги қариялар уйида деменция (ақлий қобилият пасайиши) касаллигидан даволанмоқда. У қариялар уйи ходимларига ўзининг ҳаёти ҳақида айтиб берган, шундан сўнг улар терговчилар билан боғланиб, 1992 йилда йўқолган аёл қариялар уйида эканини билдирган.

Копта билан 20 йил ҳаёт кечирган эри Боб Копта ва синглиси Глория Смит полиция ДНК далиллари орқали уларнинг яқин кишиси ҳақиқатан ҳам Пуэрто-Рикода эканини аниқлаганида, бунга ишончсизлик билдирган.

Маълум бўлишича, Патрисия 52 ёшида ғойиб бўлгунга қадар руҳий саломатлик билан боғлиқ муаммоларга дуч келган. 1999 йилда бедарак йўқолганидан етти йил ўтиб, қариялар уйи ходимлари Копта хонимни Пуэрто-Рико кўчаларида кезиб юрганини пайқаган ва у пансионатга жойлаштирилган. Патрисия шахсий ҳаёти ёки келиб чиқишини бу ердаги масъуллар билан муҳокама қилишдан бош тортган. 

Қариялар уйи ходимлари Патрисия Коптанинг ДНКсини терговчиларга юборган. Кейин унинг жияни ва синглиси Глория Смитдан ДНК намуналари олиниб, лабораторияга жўнатилган. Текширув натижасида Пуэрто-Рикодаги аёл ҳақиқатан ҳам Копта хоним экани маълум бўлган.

Глория Смит яқинда Пуэрто-Рикодаги опаси билан кўришишини айтган. Боб Копта ҳам хотинига нима бўлганини билганидан мамнун эканини айтган.