Ҳиндистонда эркак қалбан покланиш учун 5 йилдан бери тик турибди (видео)

Ҳиндистонлик Даулат Гири Жи Маҳараж исмли эркак Шива маъбудига бағишланган қадимий “кхада тапасья” руҳий амалиётига риоя қилган ҳолда, беш йилдан буён бир жойда тинимсиз тик турибди. Бу ҳақда Taaza TV хабар берди.  

Қасамга кўра, эркак кетма-кет 12 йил давомида тик турган ҳолатда вақт ўтказиши керак. Ҳиндуилик анъанасига кўра, бундай қатъий таркидунёчилик руҳий куч-қувватга эга бўлишга ва маъбудга яқинлашишга ёрдам беради, деб ишонилади.

Маҳараж ушбу амалиётни бошлаганидан бери ҳеч ҳам ўтирмайди ва оёқларини ёзмайди. Ҳатто ухлашни ҳам тик турган ҳолда амалга оширади – бунда унга мувозанатни сақлашга ва йиқилиб тушмасликка махсус тиргак конструкция ёрдам беради.

Кўп йиллик оғирлик унинг соғлиғига жиддий таъсир кўрсатган. Унинг оёқлари қаттиқ шишиб, қорайиб кетган, қон айланиши эса сезиларли даражада ёмонлашган. Шунга қарамай, эркак ўз қасамига содиқ қолишда давом этмоқда. 

Маҳаражнинг аҳволини маҳаллий ибодатхона қошидаги кўнгиллилар назорат қилиб бормоқда. Улар мунтазам равишда унинг оёқларига шифобахш малҳамлар суртиб, зарур парваришни амалга оширмоқда. Ушбу руҳий амалиёт якунланиши учун эркак яна етти йил тик туриши керак бўлади.