“Ҳамма сени ёмон кўради”. Трамп Нетаньяху билан “ажрашмоқчи” бўлган – ОАВ

АҚШ Президенти Дональд Трампнинг Оқ уйга қайтиши ҳақидаги янги китобда унинг Исроил Бош вазири Биньямин Нетаньяху билан бўлган кескин суҳбати тафсилотлари очиқланди. Бу ҳақда “The Independent” хабар берди.

Журналистлар Мэгги Хаберман ва Жонатан Суоннинг китобида даъво қилинишича, ўтган йилнинг кузида Дональд Трамп ва Биньямин Нетаньяху ўртасида кескин телефон мулоқоти бўлиб ўтган. “The Independent” нашрининг ёзишича, баҳсга Ғазо секторида ўт очишни тўхтатиш бўйича Америка режасининг муҳокамаси сабаб бўлган. Китоб муаллифларининг таъкидлашича, Трамп Исроил Бош вазиридан таклиф қилинган келишувни қўллаб-қувватлашни талаб қилган.

“Ҳамма сендан чарчади, Биби. Барча яҳудийлар сендан чарчади”, дея Трампнинг сўзларидан иқтибос келтирилади китобда.

Муаллифларнинг маълумотларига кўра, Америка етакчиси агар Нетаньяху келишувдан бош тортса, икки иттифоқчи ўртасида “ажрашиш” юз бериши мумкинлиги ҳақида ҳам огоҳлантирган.

Китобда даъво қилинишича, якунда Нетаньяху таклиф қилинган режага рози бўлган. Ушбу ихтилофга қарамай, сиёсатчилар ўртасидаги муносабатлар сақланиб қолган. Кейинчалик, Исроил Бош вазири Трампни Эронга қарши ҳарбий кампанияни қўллаб-қувватлашга ишонтира олган.

Эслатиб ўтамиз, аввалроқ ҳам Дональд Трамп Биньямин Нетаньяху билан телефон орқали мулоқот чоғида уни кескин танқид қилиб, “ақлдан озган” деб атагани ҳақида хабар берилган эди.